Рөстәм Миңнеханов: Безнең илнең ислам икътисадын үстерү өлкәсендә зур перспективалары бар

Татарстан Рәисе Рөстәм Миңнеханов Манамада (Бәхрәйн) ислам банкингы һәм финанслары буенча 19 нчы еллык конференцияне ачу тантанасында чыгыш ясады. Быелның төп темасы - "Мөселман икътисадлары өчен тотрыклы, нәтиҗәле һәм сыгылмалы хәләл экосистема булдыру өчен ислам финанславын куллану".

Сәламләү чыгышында ТР Рәисе Бәхрәйн Әмире Хамәд бин Иса Әл Хәлифкә һәм конференцияне оештыручыларга Татарстан делегациясенең ислам банкингы һәм финанслары буенча форумда катнашу мөмкинлеге өчен рәхмәт белдерде. ТР Рәисе искәрткәнчә, ул Россия Федерациясе Президенты Владимир Путин кушуы буенча «Россия - ислам дөньясы» стратегик караш төркемен җитәкли.

Рөстәм Миңнеханов ассызыклаганча, Россияне ислам дәүләтләре белән тыгыз, ышанычлы мөнәсәбәтләр бәйли. "Россия ислам дөньясы белән иң киң эшлекле һәм гуманитар хезмәттәшлек өчен ачык. Илебезнең мөселман дәүләтләре белән хезмәттәшлегенең мөһим механизмнарыннан берсе – „Россия – Ислам дөньясы“ стратегик караш төркеме. Төркем үз илләрендә абруйлы һәм йогынтылы булган иҗтимагый-сәяси эшлеклеләр, эшлекле даирәләр, фәнни җәмәгатьчелек һәм руханилар дәрәҗәсендә консультацияләр уздыру мәйданчыгын тәшкил итә", - диде Рөстәм Миңнеханов. Ул ассызыклаганча, Татарстан Россиянең Ислам хезмәттәшлеге оешмасы белән элемтәләрен үстерүгә үз өлешен кертә. "Ислам хезмәттәшлеге оешмасы ярдәмендә без ел саен „Россия – Ислам дөньясы: KazanForum“ халыкара икътисадый форумын уздырабыз. Бу - Россия һәм мөселман дәүләтләре хезмәттәшлеге мәсьәләләре буенча фикер алышу буенча илебездә иң эре икътисадый мәйданчык", - дип игътибарны юнәлтте Татарстан Рәисе һәм конференциядә катнашучыларны киләсе елның май аенда чираттагы форумда катнашырга чакырды.

Рөстәм Миңнеханов билгеләп үткәнчә, Россиянең ислам икътисады үсеше өлкәсендә зур перспективалары бар. Ул искәрткәнчә, Татарстан - Россиядә ислам (партнерлык) банкингы һәм финанслау принципларын кертү буенча сынау төбәге. Россия Федерациясе Үзәк банкы реестрында 27 оешма бар, шуларның 20се Татарстанда эшчәнлек алып бара. Базарда Ислам финанславының барлык төп продуктлары бар. "Алар ислам финанс институтлары - AAOIFI өчен бухгалтерлык хисабы һәм аудит буенча оешмада сертификацияләнгән Татарстан белгечләре тарафыннан эшләнгән. AAOIFI белән хезмәттәшлек кысаларында Россия ислам институты каршында Россиядә бердәнбер оешманы сынау үзәге булдырылды - бу илдән чыкмыйча гына сертификацияләнгән эксперт булырга мөмкинлек бирә", - дип ассызыклады ул. Бүгенге көндә Россиядә шундый сертификатлы 12 белгеч бар. "AAOIFI белән багланышларны үстерү бүген безнең өчен мөһим бурыч булып тора", - дип йомгаклады Рөстәм Миңнеханов.

Тантанада AAOIFI Попечительләр советы рәисе Шәех Ибраһим бин Хәлифә Әл Хәлифә, Ислам үсеш банкы институты генераль директоры Сами Әл Сувәйләм, Фәләстин акча әйләнеше идарәсе (Фәләстин Үзәк банкы) рәисе доктор Ферас Милхем һәм Da Afghanistan Bank (Әфганстан Үзәк банкы) җитәкчесе Нур Әхмәт Агха чыгыш ясады.

Чара кысаларында Рөстәм Миңнеханов AAOIFI һәм РФ Үзәк банкы арасында Хезмәттәшлек турындагы меморандумны имзалау тантанасында катнашты. Шулай ук Татарстан Рәисе барында AAOIFI һәм ТР Инвестицион үсеш агентлыгы арасында килешү имзаланды.

Ислам банкингы һәм финанслар буенча конференция ел саен Бәхрәйн Мәмәләкәтендә AAOIFI оешмасы һәм Ислам үсеш банкы (ИБР) химаясе астында Бәхрәйн Үзәк банкы патронажы астында уздырыла.

Катнашучылар арасында: банклар, күзәтчелек һәм җайга салу органнары, ислам финанс институтлары вәкилләре, бухгалтерлык, аудитор һәм юридик фирмалар, академик учреждениеләр белгечләре.