Рөстәм Миңнеханов Сербия Республикасы Президенты белән очрашуда: Ышанам ки, безнең партнерлык ныгый гына барачак.

Татарстан Рәисе Рөстәм Миңнеханов Сербия Республикасы (Босния һәм Герцеговина) Президенты Милорад Додик белән очрашты. Очрашу ТР Хөкүмәте Йортында узды. Президент төнлә Белград-Казан туры рейсы белән килде.

Рөстәм Миңнеханов Милорад Додикка БРИКС саммитында катнашу өчен Казанга визиты өчен рәхмәт белдерде. «Бу бөтен илебез өчен зур һәм әһәмиятле вакыйга", - диде ул. Республика Рәисе билгеләп үткәнчә, Сербия Республикасы Президенты белән очрашулар даими характерда.

Рөстәм Миңнеханов һәм Милорад Додик 2021 елда - Босния һәм Герцеговинада, шулай ук быел февраль аенда Казанда «Киләчәк Уеннары» кырларында очрашкан иделәр. Ә ПХИФ кысаларындагы соңгы очрашуда төбәкләр арасында хезмәттәшлек турында беркетмә имзаланды. "Аны гамәлгә ашыру буенча чаралар планы әзерләнде. Ышанам ки, безнең партнерлык ныгый гына барачак", - дип ассызыклады ТР Рәисе.

Очрашуда сәүдә-икътисадый хезмәттәшлекне үстерү перспективалары турында фикер алыштылар. «Без үзара сәүдә күләмнәрен киңәйтү һәм уртак проектларны гамәлгә ашыру белән кызыксынабыз", - диде Рөстәм Миңнеханов. Сәүдә-икътисадый һәм фәнни-техник хезмәттәшлекнең перспектив юнәлешләре арасында Татарстан Рәисе нефть химиясен, вертолетлар һәм машина төзелешен, медицина һәм фармацевтика сәнәгате, энергетика, АСК, төзелеш һәм инфраструктура проектлары, җиңел сәнәгатьне һ.б. атады. Ул шулай ук мәдәни һәм фәнни-мәгариф, туризм һәм спорт өлкәләрендәге багланышларның мөһимлеген билгеләп үтте.

"Без Сезгә очрашуыгыз өчен рәхмәтле. Сербия Республикасы белән үзара файдалы хезмәттәшлекне киләчәктә дә үстерергә әзер булуыбызны тагын бер кат ышандырасым килә», - диде Татарстан Рәисе. Сербия Республикасы Президенты Татарстан белән барлык тармаклар буенча хезмәттәшлекне үстерү ниятен раслады.

"Безнең дуслыкның югары дәрәҗәсен, шулай ук хезмәттәшлекне үстерү зарурлыгын раслыйсым килә. Якын арада без хезмәттәшлек планын гамәлгә ашыру буенча барлык адымнарны ачыклау өчен эш төркемнәре төзиячәкбез", - диде Милорад Додик. Ул билгеләп үткәнчә, Татарстан Россиянең алдынгы төбәкләренең берсе. «Безне республиканың инновация өлкәсен үстерү тәҗрибәсе аеруча кызыксындыра. Уртак эш өчен без мәдәният, туризм һәм мәгариф өлкәсендә зур киңлек күрәбез. Сербия Республикасының да Татарстанга тәкъдим итәр нәрсәсе бар дип саныйм», - дип ассызыклады Президент әфәнде.

Очрашу азагында Рөстәм Миңнеханов һәм Милорад Додик 2024-2026 елларга Татарстан Республикасы белән Сербия Республикасы арасында сәүдә-икътисадый, фәнни-техник, социаль һәм мәдәни-гуманитар хезмәттәшлек турындагы беркетмәне гамәлгә ашыру буенча чаралар планын имзаладылар. Ул сәүдә һәм инвестицияләр, сәнәгать, авыл хуҗалыгы, медицина һәм сәламәтлек саклау, мәгариф, муниципаль үсеш кебек хезмәттәшлек юнәлешләрен үз эченә ала.

Татарстан Республикасы ягыннан эшне җайга салуны Сәнәгать һәм сәүдә министрлыгы башкарачак.