Рөстәм Миңнеханов Казанда берничә дини объектта булды

Татарстан Рәисе Рөстәм Миңнеханов Казанда берничә дини объектта булды. Аны Казан мэры Илсур Метшин, республика Рәисе ярдәмчесе Олеся Балтусова, Мәдәни мирас объектларын саклау буенча Татарстан Республикасы комитеты рәисе Иван Гущин озата йөрде.

Программада беренче объект Казан Богородицкий монастыре булды. Өч ел элек биредә яңадан торгызылган Казан Изге Ана иконасы соборы ачылган. Монастырь комплексын алга таба торгызу эшләре Татарстан Республикасы Рәисе кушулары кергән исемлекне үтәү кысаларында башкарыла. 2024 елның мартында объектта әзерлек һәм проектлау эшләре башланды. Бүгенге көндә конструкцияләрне һәм фундаментларны тикшерү эшләре башкарылган, соңгы конструкцияләр демонтаж ителгән, архив тикшеренүләре башкарылган, сак предметлары эшләнгән һәм расланган, беренче чираттагы аварияләргә каршы чаралар проектлары эшләнгән. Казан епархиясе инициативасы нигезендә, комплексның өстенлекле объекты итеп Никола Тульский чиркәве бинасы билгеләнгән. ТИГП тәкъдиме нигезендә, силикат кирпечтән торган әлеге корылманың өченче катын ныклыгын саклап калган тарихи дәрәҗәгә кадәр демонтажлау планлаштырыла. Бүген шулай ук Настоятель корпусы астындагы подвалларны ачуга әзерлек эшләре алып барыла.

Аннары Рөстәм Миңнеханов 1823 елда төзелгән һәлак булган сугышчылар Храм һәйкәлен ремонтлау-торгызу эшләренең барышы белән танышты. Ул Казансу елгасы акваториясендә урнашкан һәм күпер аша чыгу юлы ярдәмендә ярга тоташа. Һәйкәл биек постаментка күтәрелгән 20 метрлы дүртпочмаклы кисеп ясалган пирамидадан гыйбарәт. Дүрт яктан -грек портиклары һәм ике дорик колонна белән бизәлгән бинага керү юллары. Төрле елларда биредә ремонт эшләре башкарылган. Быел храмны колачлы реставрацияләү башланды, ул 2026 елда тәмамланырга тиеш. Һәйкәл яңартылганнан соң Казанда яшәүчеләрне һәм туристларны тагын да күбрәк җәлеп итәр дип көтелә. Аларга уңайлы шартлар тудыру өчен тиешле инфраструктура белән комплекслы төзекләндерү планлаштырыла - биредә җәяүлеләр юллары, санитария төеннәре, шулай ук елга трамвайчылары өчен причал төзелергә тиеш.

Аннары Рөстәм Миңнеханов 1802 елда төзелгән «Иске таш" мәчеттә булды. Үз вакытында гыйбадәт йорты Яңа Татар бистәсенең иҗтимагый үзәге булган. Совет чорында мәчетне ябалар һәм башка кирәк-яраклар өчен җиһазландыралар. Башта биредә мәктәп, аннары склад ачканнар. 1990 елларда мәчет дин тотучыларга кире кайтарыла. Ремонт-торгызу эшләре 2023 елда башланган, 2024 елның августында тәмамланган. Рестоврация «Тарихи хәтер» проекты кысаларында федераль акчалар хисабына алып барылган. Татарстан Рәисенә янәшәдәге территорияне алга таба үстерү концепциясен тәкъдим иттеләр.

Рөстәм Миңнеханов төзекләндерелгән «Әл-Мәрҗани» мәчетен карап чыкты. Аны 18 йөзнең икенче яртысында төзегәннәр. Ул Татарстан башкаласында төзелгән беренче таш мәчетләр рәтенә керә. Ремонт эшләре ике этапта алып барылган. Аварияләргә каршы чаралар кысаларында мәчетнең гөмбәзләре һәм фасадларындагы ярыкларны, манараны һәм түбәсен ремонтлауны да кертеп, барлык конструкцияләрне көчәйткәннәр. Вентиляция, җылыту, кондиционер системалары алыштырылган, суүткәргеч һәм электр белән тәэмин итү челтәрләре яңартылган. Реставраторлар фасадларга барокко стилендәге тарихи кыяфәтен кайтарганнар, декорны, тәрәзәләрне һәм декоратив-нәфис металл эшләнмәләрен торгызганнар. Рөстәм Миңнеханов бу елның августында «Әл-Мәрҗани» мәчетендә булган иде инде. Визит йомгаклары буенча ремонт-торгызу эшләрен төгәлләү, аерым алганда, эчке интерьерларны бизәү, юыну бүлмәләренең җылы идәннәрен төзекләндерү, территорияне төзекләндерү, шулай ук музей киңлеген оештыру буенча йөкләмәләр бирелгән иде. Хәзерге вакытта реставрация тулы күләмдә төгәлләнгән.