Татарстан Рәисе Рөстәм Миңнеханов «Көнчыгыш Кубогы» халыкара балалар турнирын ябу тантанасында катнашты

Бүген Татарстан Рәисе Рөстәм Миңнеханов «Көнчыгыш Кубогы» халыкара балалар турнирының ябылу тантанасында катнашты.

Чара «Яшь гвардия» балаларны савыктыру лагере базасында узды (Казан).

Исегезгә төшерәбез, «Көнчыгыш Кубогы» халыкара турниры Казанда 2024 елның 20-22 сентябрендә узды. Анда Россия, Әзәрбәйҗан, Казахстан, Кыргызстан, Үзбәкстан, Согуд Гарәбстаны һәм Берләшкән Гарәп Әмирлекләреннән футбол командалары катнашты.

Турнир «Рубин» футбол клубы һәм Татарстан Республикасы Спорт министрлыгы тарафыннан оештырылды.

Ярышларда 10-11 яшьлек яшь футболчылар катнашты. 20 сентябрьдә шобага үткәрелде, шуннан соң турнирга старт бирелде. Бүген, 22 сентябрьдә, ябылу һәм җиңүчеләрне бүләкләү тантанасы узды. «Көнчыгыш Кубогы» халыкара балалар турнирында финалда «Елимай» клубының Казахстан яшьтәшләрен җиңгән «Рубин» командасы җиңүче булды.

Спортчылар һәм җанатарлар, турнир кунаклары алдында чыгыш ясап, Рөстәм Миңнеханов яшь футболчыларны, ата-аналарны һәм кунакларны сәламләде. «Биредә 7 илдән вәкилләр җыелды, барлык командалар да җиңү өчен көрәште, хис-кичерешләр - бары тик уңай, - диде ул. - Турнирның төп оештыручысы буларак, «Рубин» футбол клубына, шулай ук ярышларны уздыруда ярдәм иткән һәркемгә зур рәхмәт». Яшь спортчыларга мөрәҗәгать итеп, Рөстәм Миңнеханов алар арасында киләчәктә танылган футболчылар булачагына ышаныч белдерде, ул барысына да футболда югары дәрәҗәләргә ирешүләрен теләде. «Ышанам ки, барысы да уңышлы булыр», - диде ТР Рәисе.

«Рубин» ФК президенты Марат Сафиуллин шулай ук Татарстан Рәисе Рөстәм Миңнехановка клуб тарихында беренче халыкара турнир уздыруда һәрьяклап ярдәм иткәне өчен рәхмәт белдерде. «Көнчыгыш Кубогы" - футболның шәһәрләрне, кешеләрне һәм илләрне берләштерүенең ачык мисалы. Катнашучы барлык командаларга да зур рәхмәт. Җанатарларга ярдәмнәре өчен зур рәхмәт. Рөстәм Нургалиевич, әгәр сез безгә ярдәм итсәгез, без бу турнирны традицион итәргә тырышачакбыз», - диде ул.

Моннан тыш, «Көнчыгыш Кубогы» турниры кысаларында ярышларда катнашучылар вәкилләре арасында Хезмәттәшлек турында меморандум имзаланды.