Алексей Песошин һәм Мәкъсүт Шадаев Kazan Digital Week – 2024 форумын ябу тантанасында катнаштылар

Бүген «Казан Экспо» мәйданчыгында Kazan Digital Week – 2024 халыкара форумын ябу тантанасы узды. Чарада Россия Цифрлы үсеш, элемтә һәм массакүләм коммуникацияләр министры Мәкъсүт Шадаев һәм Татарстан Премьер-министры Алексей Песошин катнашты.

Kazan Digital Week - илебез инновацияләрен һәм алдынгы цифрлы хәл ителешләрне күрсәтү өчен иң колачлы һәм танылган мәйданчыкларның берсе. Быел форум кысаларында 100 секция һәм мастер-класслар узды, аларда 600 спикер чыгыш ясады. KDW-2024 эшендә 200 компания катнашты, хезмәттәшлек турында 50 килешү һәм перспективалы ниятләр турында меморандумнар имзаланды. Форумга дөньяның 60тан артык иленнән 16 меңнән артык кеше килде. 10 мең квадрат метр мәйданлы күргәзмә экспозициясендә Россиянең 140 алдынгы компаниясе һәм корпорациясе үз эшләнмәләрен тәкъдим итте.

Мәкъсүт Шадаев үзенең сәламләү сүзендә форумның масштабларын һәм аның эчтәлеген югары бәяләде. "Бу көннәрдә бездә эш бик эчтәлекл булды. Без Татарстан Рәисе белән форум нәтиҗәләре буенча уртак йөкләмәләр исемлеген әзерләргә килештек. Иң беренче йөкләмә - форумда катнашучыларның барысына да киләсе елга бирегә килергә, без барыгызны да көтәбез. Татарстан Хөкүмәтенә, республиканың Цифрлы үсеш министрлыгына, Kazan Digital Week катнашучыларына рәхмәт белдерәм. Быелгы форум кысаларында без бик күп кызыклы мәсьәләләр күтәрдек. Тулы бер елга эш тәртибе безнең тарафтан формалаштырылды", - дип ассызыклады РФ Цифрлы үсеш министрлыгы башлыгы.

Аннары ТР Фәннәр академиясе президенты Рифкать Миңнеханов һәм РФ цифрлы үсеш, элемтә һәм массакүләм коммуникацияләр министры урынбасары Олег Качанов «ИТ Лидер», «Иң яхшы мәкалә», «Массакүләм мәгълүмат чараларында форум турында иң яхшы язма өчен» конкурсларында җиңүчеләргә бүләкләр тапшырдылар. Алексей Песошин ассызыклаганча, форум программасы мөһим һәм актуаль темаларга бай иде. Форумда мәдәниятне, сәламәтлек саклауны, транспорт һәм мәгарифне цифрлаштыру мәсьәләләренә кагылдылар, алдынгы технологияләр ярдәмендә бу өлкәләрнең ничек үзгәрә алуын күрсәттеләр. Кибер иминлеккә аерым игътибар бирелде: киберһөҗүмнәрне булдырмау өчен критик мәгълүмати инфраструктураны һәм ясалма интеллект өлкәсендәге эшләнмәләрне яклау темасына секцияләр һәм түгәрәк өстәлләр үткәрелде. Секцияләр кысаларында интеллектуаль транспорт системаларыннан алып дәүләт хезмәтләрен цифрлаштыруга һәм сәнәгатьтә ясалма интеллектны куллануга кадәр төрле мәсьәләләр каралды. Шулай ук стартапларга да игътибар бирелде: сессия узды, анда яшь командалар потенциаль инвесторларга үз проектларын тәкъдир иттеләр.

"Форум сентябрьнең ике көнен генә колачламады. Аның актив эше май аенда ук хакатоннар марафонын уздырудан башланды, ул 9 сентябрьдә иң яхшы проектларны тәкъдир итү белән тәмамланды. Хакатоннар ИТ-белгечләргә үз белемнәрен реаль бизнес-чишелешләр булдыру өчен кулланырга мөмкинлек бирде. Хакатоннар - талантлар эзләү һәм бизнесның актуаль бурычларын хәл итәргә ярдәм итә торган продуктлар эшләү өчен менә дигән мәйданчык», - дип билгеләп үтте Татарстан Премьер-министры. Форумның әһәмиятле вакыйгасы Бөтенроссия студентлар киберкөрәше булды, ул мәгълүмат системаларын саклау күнекмәләрен эшләү өчен Россия югары уку йортлары студентларын җыйды. "Мондый инициативалар цифрлы киңлектә иминлекне тәэмин итәчәк белгечләрнең яңа буынын әзерләү өчен мөһим", - диде Алексей Песошин.

Татарстан Республикасы Премьер-министры форумның барлык партнерларына, шулай ук катнашучыларга, галимнәргә, дәүләт корпорацияләре вәкилләренә һәм ИТ-белгечләргә цифрлы технологияләр үсешенә керткән өлешләре өчен рәхмәт белдерде.

Аннары Татарстан Хөкүмәте башлыгы «Хакатон» конкурсында һәм III Бөтенроссия студентлар киберкөрәшендә җиңүчеләрне бүләкләде.