Рөстәм Миңнеханов: Без Төркия белән сәүдә-икътисадый һәм инвестицион хезмәттәшлекне үстерүгә зур игътибар бирәбез

Татарстан Рәисе Рөстәм Миңнеханов Төркия Республикасы сәүдә министры урынбасары Мәхмүт Гюрҗан һәм Төркия Республикасы Сәнәгать һәм технологияләр министры урынбасары Зәкәрия Чёшту белән очрашты. Очрашу «Kazan Digital Week» форумы кысаларында «Казан Экспо»да узды.

Рөстәм Миңнеханов кунакларга Татарстанга визитлары һәм «Kazan Digital Week»та катнашулары өчен рәхмәт белдерде. Шулай ук эш программасы кысаларында «Алабуга» МИЗда Төркия предприятиеләрендә булу планлаштырыла. «Без традицион рәвештә Төркия белән сәүдә-икътисадый һәм инвестицион хезмәттәшлекне үстерүгә зур игътибар бирәбез, – дип ассызыклады ТР Рәисе. - Моңа делегацияләрне актив алмашу, Төркиянең Казандагы Генераль консуллыгының һәм Татарстанның Истанбулдагы Тулы вәкаләтле вәкиллегенең нәтиҗәле эше, турыдан-туры авиация элемтәсе ярдәм итә». Республика Рәисе билгеләп үткәнчә, икътисадый өлкәдә багланышлар актив үсә. Барыннан да элек, бу инвестицион хезмәттәшлек. Төркия компанияләре республикага якынча 2 2 млрд. инвестицияләгән. Төркия Республикасы җитәкчелеге һәм шәхсән Президент Эрдоган ярдәме белән Татарстанда берничә заманча завод төзелгән. Алар барысы да уңышлы эшли.

Моннан тыш, узган елда үзара товар әйләнеше 2,9 млрд доллар тирәсе тәшкил иткән, 2,5 тапкырга диярлек тәэсирле үсеш күрсәткән. "Без Төркия бизнесының Татарстанда үз проектларын алга таба да үстерүе белән кызыксынабыз. Безнең республика Россия һәм Евразия базарларына чыгу мәйданчыгы сыйфатында чыгыш ясарга әзер. Без сезнең компанияләргә киләчәктә дә ярдәм итәргә әзер. Яңа уртак проектларга өметләнәбез", - диде Рөстәм Миңнеханов.

Мәхмүт Гюрҗан Татарстанның икътисадтагы һәм инвесторлар белән эшләүдәге казанышларын югары бәяләде. "Сезгә җылы кабул итүегез өчен рәхмәт белдерәсем килә. Без сәүдә-икътисадый элемтәләребезнең ничек үсүен күрәбез. Татарстанда эшләргә теләүче Төркия инвесторлары саны бу турыда үзе үк ап-ачык белдерә", - дип ассызыклады ул.

Зәкәрия Чёшту үз чиратында инновацияләр өлкәсендә хезмәттәшлекне актив үстерергә тәкъдим итте.