Рөстәм Миңнеханов «Татнефтехиминвест-холдинг» АҖ Директорлар советының чираттагы утырышын уздырды

Татарстан Рәисе Рөстәм Миңнеханов «Татнефтехиминвест-холдинг» АҖ Директорлар советының чираттагы утырышын уздырды. Чара ТР Хөкүмәте Йортында узды. Эштә Татарстан Премьер-министры Алексей Песошин катнашты. Утырыш кысаларында кайбер перспектив проектларны тәкъдир иттеләр.

КФУның Геология һәм нефть-газ технологияләре институты кафедра мөдире Михаил Варфоломеев университет базасында Нефть-газ һәм катнаш тармаклар өчен кече тоннажлы химия өлкәсендә яңа инженерлык эшләнмәләре үзәге турында сөйләде. Махсуслаштырылган аз тоннажлы химия катламны гидротөзү, бораулау, нефть бирүчәнлекне арттыру, скважиналарны эшкәртү, газ һәм суны блоклау, продукцияне әзерләү һәм транспортлау технологияләрен үтәү өчен кирәк. Махсуслаштырылган реагентларның күп өлеше чит илнеке. Доклад барышында Михаил Варфоломеев, планлаштырыла торган үзәк базасында Россия чималын тирәнрәк эшкәртү өчен кулланып, аз тоннажлы химиянең җитештерү чылбырын булдыру турында мәгълүмат бирде. Аны булдыру фәнни идеядән алып пилот производствоны гамәлгә ашыруга кадәр бөтен юлны үтәргә мөмкинлек бирәчәк. Проектны ел дәвамында эшләтеп җибәрү планлаштырыла. "Тема бик кызыклы. Бу юнәлешне үстерү бик мөһим", - диде Татарстан Республикасы Рәисе. 

«Квантум» (Екатеринбург) дәүләт корпорациясе җитәкчесе Кирилл Чинцов энергияне сак тоту һәм экологияне яхшыртуның инновацион технологияләрен тәкъдим итте. «Квантум» ДК су ресурсларын, табигый газны экономияләү һәм җылылык энергиясен эшләп чыгаруны арттыру өлешендә бюджет өлкәсе объектлары һәм җылылык белән тәэмин итүче оешмалар өчен энергияне сак тоту технологияләрен җитештерү һәм гамәлгә кертүдә махсуслаша. Нотыкчы энергияне сак тоту һәм су ресурсларын экономияләү проектларын гамәлгә ашыруда республика белән хезмәттәшлек итү белән кызыксынуын белдерде. Татарстан Рәисе ТР Төзелеш, архитектура һәм торак-коммуналь хуҗалык министрлыгына «Квантум» компаниясе вәкилләре катнашында эшче төркем төзергә һәм тәкъдим ителгән технологияләрне республика объектларында куллану мөмкинлеген карарга кушты. 

«Саклагыч өслекләрнең технологик системалары» ҖЧҖ (Мәскәү) эшчәнлеге турында компаниянең генераль директоры Лев Балдаев сөйләде. "ТСЗП" газ турбиналары җайланмаларының детальләренә һәм узелларына сервис хезмәтен күрсәтү белән шөгыльләнә. Мисал өчен, сервис вакытында күп санлы чит ил газ турбиналары җайланмаларының кайнар тракт детальләре нигездә җитештерүчедән яңа комплектлаучы детальләр китерү хисабына яңартыла иде яки җиңел ремонт ясала иде. Хәзерге вакытта «ТСЗП» ремонт-конструкторлык документациясе комплектларын һәм төрле типтагы газ турбиналары җайланмалары детальләрен һәм төеннәрен катлаулы ремонтлау технологияләрен эшләде. Нотыкчы Татарстан белән хезмәттәшлекнең перспектив юнәлешләрен билгеләде, шул исәптән «Казан моторлар төзү җитештерү берләшмәсе» белән дә. 

«МД-Групп» ҖЧҖ (Мәскәү өлкәсе) генераль директоры Донат Гарист «AURA» төтен һәм ялкынны мониторинглауның югары технологияле системасын тәкъдир итте. Детектор мизгелдә (1 секундтан да кимрәк) 6 метр ераклыктан ялкынны теркәргә һәм 9 кв. м мәйданда төтен барлыкка килүен сизәргә сәләтле. «AURA» үзен Россиянең иң эре аэропортларында (шул исәптән Н.В.Лемаев исемендәге "Бигеш" аэропортында), сәнәгать предприятиеләрендә, сәламәтлек саклау һәм мәгариф объектларында, сәүдә һәм офис үзәкләрендә, кунакханәләрдә һәм тулай торакларда, шулай ук кешеләр күпләп җыела торган объектларда теркәгән. 2014 елдан башлап бөтен ил буенча 1000нән артык уңышлы проект башкарылган. "Гадәттән тыш хәлләр министрлыгы һәм торак-коммуналь хуҗалык хезмәтләре белән бергә әлеге системаны өйрәнергә кирәк. Тулаем проект кызыклы", - дип билгеләп үтте Рөстәм Миңнеханов.  

Җиһазларны ремонтлау өлкәсендә комплекслы карарлар Мәскәүдән «Супервэйв Групп» компаниясе тәкъдим итәргә әзер. Компания базарда 1990 нчы еллар башыннан эшли. Компания генераль директоры Виктор Силкин билгеләп үткәнчә, статистика буенча җайланмаларның 80% ы торгызылырга тиеш. Бу яңа җиһазлар сатып алуга чыгымнарны 60% ка киметергә мөмкинлек бирә. 2015 елдан компания 20 млн җайланманы торгызган. Утырыш барышында Виктор Силкин цифрлы техниканы торгызу һәм модернизацияләү буенча хезмәтләр тәкъдим итте: компьютерлар, телекоммуникация җайланмалары һ. б. 

Рөстәм Миңнеханов билгеләп үткәнчә, бүген республикада күп төрле техниканы яңартуны таләп ителә. Татарстан Республикасы Цифрлы үсеш министрлыгы башлыгы Айрат Хәйруллин үз чиратында «Супервэйв Групп» компаниясе белән эш алып барылуын, аерым алганда, сәламәтлек саклау өлкәсендә мөмкин булган проектлар каралуын хәбәр итте.