Рөстәм Миңнеханов Беларусь вице-премьеры Виктор Каранкевич белән очрашты

Татарстан Рәисе Рөстәм Миңнеханов Беларусь Республикасы Премьер-министры урынбасары Виктор Каранкевич белән очрашты. Очрашу «Казан Экспо»да Татарстан нефть-газ химиясе форумы кырларында узды.

Рөстәм Миңнеханов билгеләп үткәнчә, Татарстан дустанә Россия-Беларусь мөнәсәбәтләре кысаларында Беларусь белән багланышларны киңәйтү мөмкинлеген югары бәяли. Ул ассызыклаганча, ике ил Президентлары да регионнар дәрәҗәсендә элемтәләрне үстерүгә актив ярдәм итәләр.

«Безнең товар әйләнеше шактый зур, әмма һәрчак омтылыр урын бар. Без күп еллар Белоруссия компанияләре - „Белнефтехим“, „Минск трактор заводы“ һәм башкалар белән уңышлы хезмәттәшлек итәбез. Татарстан авыл хуҗалыгы техникасының шактый өлеше шулай ук Белоруссиядә җитештерелгән. Безнең компанияләр шулай ук Беларуста да бар. Аерым алганда, „РариТЭК“ компаниясе сезнең машина төзелеше предприятиеләре белән актив хезмәттәшлек итә. Башка мисаллар да күп", - диде ТР Рәисе. 

Рөстәм Миңнеханов нефть химиясе, машина төзелеше, агросәнәгать комплексы, транспорт, җиңел сәнәгать һәм башка өлкәләрдә хезмәттәшлек перспективаларын билгеләп үтте. Казан маршрутларында эшләүче белорус автобуслары һәм трамвайлары үзләрен яхшы яктан күрсәтте. Эшлекле һәм туристик элемтәләрне үстерүгә Казан белән Минск арасында туры авиарейслар ярдәм итә. 

Виктор Каранкевич билгеләп үткәнчә, Татарстан - Беларусь өчен мөһим сәүдә партнеры. Ул ассызыклаганча, бу дустанә багланышлар вакыт белән тикшерелгән һәм аларны үстерү өчен барлык мөмкинлекләр дә бар. 

Очрашуда шулай ук үзара сәүдә күләмнәрен киңәйтү һәм уртак проектлар перспективалары мәсьәләләре каралды.