Рөстәм Миңнеханов: Татарстан һәм Самара өлкәсе икътисадый һәм мәдәни өлкәләрдә һәрвакыт тыгыз хезмәттәшлек итте

Татарстан Рәисе Рөстәм Миңнеханов Самарага визиты кысаларында Самара өлкәсе Губернаторы вазыйфаларын вакытлыча башкаручы Вячеслав Федорищев белән эшлекле очрашу уздырды.

Соңгы мәгълүматлар буенча төбәкара товар әйләнеше 30 млрд сум тәшкил итә. Татарстан Самара өлкәсенә бензин һәм дизель ягулыгы, йөк һәм җиңел автомобильләр, химия предприятиеләре продукциясен, азык-төлек продуктлары һәм халык кулланылышындагы башка товарлар, медицина җайланмалары һ. б. китереп тора. Самара өлкәсеннән республикага шулай ук йөк һәм җиңел автомобильләр, түбә материаллары, АСК продукциясе, машина төзелеше продукциясе һәм башкалар кертелә.

Самара өлкәсе белән республиканың кайбер эре предприятиеләре актив хезмәттәшлек итә. Аерым алганда, КАМАЗ, Татхимфармпрепаратлар, ПОЗИС, Аммоний, Татспиртпром, Казан вертолетлар заводы, «Ак барс» суднолар төзү корпорациясе һәм башкалар.

"Самара өлкәсе – бай сәнәгать һәм фәнни потенциалга ия төбәк. Безне яхшы партнерлык мөнәсәбәтләре бәйли. Безнең сәүдә-икътисадый элемтәләр киң", – диде Рөстәм Миңнеханов, губернатор вазыйфаларын вакытлыча башкаручыга мөрәҗәгать итеп. Ул билгеләп үткәнчә, Татарстан һәм Самара өлкәсе, Россиянең төп сәнәгать төбәкләре буларак, һәрвакыт икътисадый һәм мәдәни өлкәләрдә тыгыз хезмәттәшлек иттеләр.

Аерым Рөстәм Миңнеханов Вячеслав Федорищевның татар милли-мәдәни автономиясе активы белән  хезмәттәшлек итүенә игътибар итте.

Үз чиратында Вячеслав Федорищев билгеләп үткәнчә, Татарстан – күп күрсәткечләр буенча төбәк өчен үрнәк. Ул якын арада өлкәне үстерүнең яңа программасын кабул итү турында белдерде. Очрашу азагында Татарстан Республикасы белән Самара өлкәсе арасында Сәүдә-икътисадый, фәнни-техник, социаль һәм мәдәни хезмәттәшлек турындагы килешүне гамәлгә ашыру буенча 2024-2027 елларга Чаралар планы имзаланды.

Шулай ук бүген Вячеслав Федорищев Рөстәм Миңнехановка Самара өлкәсендә җитештерелә торган яңа «Lada Aura» автомобилен сынап карарга тәкъдим итте.