Рөстәм Миңнеханов « "Транснефть-Прикамье" - Татарстанның иң мөһим предприятиеләренең берсе

Бүген Казанда Салих Сәйдәш исемендәге Зур дәүләт концерт залында «Транснефть - Прикамье»АҖнең 75 еллыгы уңаеннан тантаналы чара узды. Чарада Татарстан Рәисе Рөстәм Миңнеханов, «Транснефть» ГАҖ президенты Николай Токарев, «Транснефть-Прикамье» АҖ генераль директоры Олег Балабанов катнашты.

Рөстәм Миңнеханов билгеләп үткәнчә, «Транснефть - Прикамье» тарихы «Шөгер - Клявлино» нефть үткәргечен эксплуатацияләү өчен оештырылган татар нефть үткәргеч конторасыннан башланды. Сугыштан соңгы катлаулы торгызу чорында бу Татарстан нефтенең зур запасларын илнең сәнәгать әйләнешенә кертүне тәэмин итәргә мөмкинлек бирде. Татарстан Рәисе тармак ветераннарына һәм башлап йөргәнинефть үткәрүчеләргә бәяләп бетергесез өлеш керткәннәре өчен рәхмәт белдерде: «Сез батырлык, ныклык һәм үз эшегезгә тугрылык үрнәге булып торасыз».

Бүген «Транснефть - Прикамье»ның 4 меңнән артык хезмәткәре 16 магистраль нефть үткәргеч, 14 нефть куу станциясе һәм 4 магистраль нефть продуктлары үткәргеченең авариясез эшләвен тәэмин итә. "Транснефть - Прикамье" - Татарстанның һәм бөтен Кама буеның әһәмиятле предприятиеләренең берсе. Аның нәтиҗәле эше - республиканың нефть чыгару компанияләренең уңышы, чималны тотрыклы рәвештә китереп тору һәм нефть эшкәртү заводлары продукциясен төяп җибәрү нигезе. Соңгы 5 елда гына да компаниянең Татарстан бюджетына салым түләүләре күләме 17 млрд сумнан артып киткән. Шулай ук" Транснефть - Прикамье" хәйрия эшчәнлегенә зур игътибар бирә", - дип ассызыклады Рөстәм Миңнеханов.

Ул билгеләп үткәнчә, "Транснефть" Татарстанның нефть һәм нефть продуктларын транспортлау өлкәсендәге стратегик партнеры гына түгел. Компания республиканың машина төзелеше комплексы предприятиеләре, фәнни-мәгариф учреждениеләре белән актив хезмәттәшлек итә, «Алабуга» МИЗда Россиядә турбулентлыкка каршы присадкалар җитештерү буенча беренче инвестпроектны гамәлгә ашыра.

"Компаниянең коллективын һәм ветераннарын истәлекле дата белән котлыйм. Күпьеллык хезмәтегез һәм Татарстанның социаль-икътисадый үсешенә керткән зур өлешегез өчен рәхмәт», - дип өстәде республика Рәисе. Николай Токарев билгеләп үткәнчә, «Транснефть - Прикамье»га нигез салынганнан бирле тармакның инновацион үсеше авангардында бара. "Зур диаметрлы нефть үткәргечләр, резервуарларның яңа конструкцияләре, диагностика, ремонт һәм саклауның яңа методлары, идарәнең яңа системалары, су асты эшләренең яңа технологияләре һ.б. узган дистә еллар эчендә гамәлгә ашырылган казанышларның шактый зур исемлеге бүген дә тулылана бара. 2022 елдан "Транснефть - Прикамье" хезмәткәрләре тарафыннан 3 меңнән артык рационализаторлык тәкъдиме бирелгән, шуларның 600дән артыгы җитештерүгә уңышлы кертелгән. Сез үз эшегезгә һәм үз илегезгә чын күңелдән бирелгән искиткеч хезмәт ияләре һәм патриотлар», - дип ассызыклады

«Транснефть» ГАҖ президенты. «Транснефть - Прикамье» АҖ генераль директоры билгеләп үткәнчә, Татарстан Республикасы белән нәтиҗәле хезмәттәшлек социаль программаларны, хәйрия проектларын тормышка ашырырга, нефть тармагын бергәләп үстерергә мөмкинлек бирә. "Алда стратегик бурычларны хәл итү тора. Алар арасында: җитештерү куәтләрен яңарту, барлык системаларның ышанычлылыгын арттыру, импортны алмаштыру, цифрлаштыру, нефть һәм нефть продуктларын өзлексез һәм авариясез китереп тору», – дип өстәде Олег Балабанов.

Чара кысаларында «Транснефть-Прикамье» АҖ хезмәткәрләренә Татарстан Республикасы дәүләт бүләкләре, шулай ук ведомство һәм корпоратив бүләкләр тапшырылды. Шулай ук Рөстәм Миңнеханов Николай Токаревка нәтиҗәле хезмәттәшлек һәм Татарстан Республикасының сәнәгать потенциалын ныгытуга зур өлеш керткәне өчен «Дуслык» орденын тапшырды.