Татарстан Рәисе: Без Каракалпакстан Республикасы белән хезмәттәшлекне үстерергә телибез

Бүген Татарстан Республикасы Рәисе Рөстәм Миңнеханов Каракалпакстан Республикасы (Үзбәкстан) Жокаргы Кенес (парламенты) Рәисе Аманбай Орынбаев белән очрашты. Очрашу Казан Кремлендә узды.

Аманбай Орынбаевның моңарчы Татарстанга килгәне булган. Ул 2023 елның октябрендә Казанда Россия һәм Үзбәкстан арасында Төбәкара хезмәттәшлекнең өченче форумында Каракалпакстан делегациясен җитәкләгән Шул ук елның ноябрендә Рөстәм Миңнеханов Каракалпакстанга барган. "Россия-Үзбәкстан мөнәсәбәтләрен ныгытуга юнәлдерелгән республикаларыбыз хезмәттәшлеген үстерүгә игътибарыгыз өчен Сезгә рәхмәт белдерәсем килә. Быелның май ахырында без Сезнең белән Ташкентта Төбәкләр форумында катнаштык, анда безнең төбәкләр арасында Хезмәттәшлек турында килешү имзаладык. Әлеге документ Татарстан белән Каракалпакстан арасындагы элемтәләрне ныгытырга мөмкинлек бирер, дип ышанам. Без парламентара багланышларыбызны үстерәбез инде», - диде Рөстәм Миңнеханов. Ул Үзбәкстан белән туганлык стратегик Россия-Үзбәкстан мөнәсәбәтләре кысаларында Үзбәкстан белән үзара хезмәттәшлекне киңәйтү мөмкинлеген югары бәяләде. Бу эштә ике дәүләт Президентының аерым казанышлары бар. "Быел Үзбәкстан белән хезмәттәшлегебез актив үсештә. Февральдә без Казанда Киләчәк Уеннарын ачуда хөрмәтле Шәүкәт Миромон улы Мирзиеёвны кабул иттек. Үз чиратында, Татарстан делегацияләре Ташкент, Сурхандәрья, Бохара һәм Навои өлкәләрендә булдылар. Шулай ук Татарстан делегациясе Ташкентта “ИННОПРОМ. Үзәк Азия" халыкара сәнәгать күргәзмәсендә катнашты", - диде республика Рәисе. Рөстәм Миңнеханов үзара сәүдә күләменең артуын билгеләп үтте. Узган ел йомгаклары буенча Татарстан-Үзбәкстан товар әйләнеше 3 370 млн тәшкил иткән - 27 процентка үсеш. "Алга таба да товарлар һәм хезмәт күрсәтүләр белән үзара тәэмин итү күләмен һәм номенклатурасын арттыру буенча эшләргә кирәк. Бездә моның өчен кирәкле һәр нәрсә бар», - дип белдерде Татарстан Рәисе. Ул Казанда - Үзбәкстанның Генераль консуллыгы, ә Ташкентта Татарстан вәкиллеге уңышлы эшләвен искәртте. Казанның Ташкент, Сәмәрканд һәм Фирганә белән туры авиаэлемтәсе эшлекле элемтәләрне һәм туризм элемтәләрен ныгытуга ярдәм итә. Берничә килешү, үзара хезмәттәшлек турында меморандум имзаланган һәм гамәлгә ашырыла. Республика Үзбәкстанның кайбер төбәкләре белән актив хезмәттәшлек итә. Татарстанның әйдәп баручы компанияләре линиясе буенча эш алып барыла. Мәсәлән, Үзбәкстан җитәкчелеге ярдәме белән "Чирчик" һәм "Җизак" химия-индустриаль технопарклары эшли. Яңа проектлар арасында "Навои" АИЗ территориясендә һәм Бохара өлкәсендә индустриаль парклар булдыру. "Бу әһәмиятле уртак проектлар - безнең илләр партнерлыгына яхшы өлеш кертү", - дип ышанып әйтте Рөстәм Миңнеханов. Ул мәдәният, туризм, спорт, фән һәм мәгариф өлкәләрендә үзара хезмәттәшлек үсешен аерым билгеләп үтте. Бүгенге көндә Татарстан югары уку йортларында 2,5 меңнән артык үзбәк студенты белем ала. Уртак эш «Россия-Ислам дөньясы» стратегик караш төркеме һәм «KazanForum» халыкара икътисади форумы линиясе буенча алып барыла. Күптән түгел Казанда Үзбәкстан спортчылары катнашкан БРИКС Уеннары узды. Быел Казанда булачак тагын бер мөһим вакыйга - БРИКС һәм БРИКС+дәүләт башлыклары саммиты". "Сезнең Татарстанга килүегез безнең хезмәттәшлекне алга таба үстерүгә ярдәм итәр дип ышанам. Конкрет гамәли чараларга күчәргә кирәк», - дип өстәде Рөстәм Миңнеханов. Аманбай Орынбаев делегациянең Татарстанга визитын югары дәрәҗәдә оештырганнары өчен рәхмәт белдерде. "Без Татарстан белән Үзбәкстан арасында төрле өлкәләрдә үзара файдалы хезмәттәшлекнең алга таба үсешен күзәтәбез. Соңгы елларда уртак тырышлыклар ярдәмендә без икътисадта, товар әйләнешен арттыруда, уртак инвестиция проектларын гамәлгә ашыруда, сәнәгать, авыл хуҗалыгы һәм туризм өлкәсендә хезмәттәшлекне үстерүдә зур уңышларга ирештек. Безнең Татарстанга сәфәребез киләчәктә хезмәттәшлекне ныгыту өчен яңа мөмкинлекләр ачар дип өметләнәбез», - диде Жокаргы Кенес Рәисе. Үзара хезмәттәшлек өчен перспектив юнәлешләр арасында ул «Алабуга» МИЗ мисалында ИТ өлкәне һәм сәнәгать мәйданчыкларын үстерү буенча тәҗрибә уртаклашуны билгеләде.

Белешмә өчен: Каракалпакстан - Үзбәкстан составындагы республика. Башкаласы һәм иң зур шәһәре - Нукус. Халык саны 2 млн кешегә җитә. Республикада ике рәсми тел бар: каракалпак һәм үзбәк телләре. Үзбәкстан территориясенең 40%ын биләп тора һәм территориясе буенча илнең иң зур төбәге. Республикада табигый газ, алтын, нефть, металл һәм башка файдалы казылмаларның зур запаслары, шулай ук үсеш алган сәнәгать һәм авыл хуҗалыгы бар. Каракалпакстан сәнәгатенең төп тармаклары - электр энергетикасы, химия һәм нефть химиясе тармаклары. Төбәктә азык-төлек җитештерү, авыл хуҗалыгы продукциясен үстерү һәм эшкәртү, дару үсемлекләре үстерү, логистика үзәкләре булдыру буенча максатчан программалар кабул ителгән һәм гамәлгә ашырыла.