Рөстәм Миңнеханов Вьетнамның Екатеринбургта Генераль консулы Динь Ван Донг белән очрашты

Бүген Татарстан Республикасы Рәисе Рөстәм Миңнеханов Вьетнам Социалистик Республикасының Екатеринбургтагы Генераль консулы Динь Ван Донг әфәнде белән очрашты. Очрашу ТР Хөкүмәте Йортында узды.

Очрашуда Россия-Вьетнам мөнәсәбәтләре кысаларында Татарстан белән Вьетнам арасында хезмәттәшлекне үстерүнең перспектив юнәлешләре турында фикер алыштылар. Рөстәм Миңнеханов ассызыклаганча, республика үз дәрәҗәсендә эшлекле һәм гуманитар элемтәләрне үстерүгә ярдәм итә.

Татарстанда Вьетнам партнерлары белән үзара хезмәттәшлек тәҗрибәсе тупланган. Вьетнамда КАМАЗ, Казан вертолетлар заводы һәм Зеленодольск суднолар төзү заводы предприятиеләре продукциясе яхшы билгеле. Исегезгә төшерәбез, Вьетнамның Екатеринбургтагы Генераль Консуллыгының консуллык округына, Татарстан Республикасын да кертеп, берничә төбәк керә.