Сатып алулар буенча Татарстан Республикасы дәүләт комитетын Марат Зыятдинов җитәкләде

Бүген Сатып алулар буенча Татарстан Республикасы дәүләт комитетының яңа җитәкчесен ведомство коллективына тәкъдим иттеләр. Ул Марат Галимҗан улы Зыятдинов була.

Исегезгә төшерәбез, элек ул 12 елдан артык югары Ослан муниципаль районын җитәкләгән иде.

Ведомство коллективына яңа җитәкчене Татарстан Республикасы Премьер-министрының беренче урынбасары Рөстәм Нигъмәтуллин тәкъдим итте. Ул, аерым алганда, Сатып алулар буенча ТР дәүләт комитетының мөһим хакимият органнарының берсе булуын искәртте.

"Хакимият органнары өчен сатып алуларның сыйфаты һәм вакытында булуы күп кенә бурычларны үтәүгә нык тәэсир итә, - диде Рөстәм Нигъмәтуллин. - Бүген күп кенә яңа продуктлар барлыкка килә, чөнки сатып алу өлкәсе динамик үсештә, ә бу тулаем системаны комплекслы күрүне таләп итә». ТР вице-премьеры Сатып алулар буенча ТР дәүләт комитеты коллективы Марат Зыятдинов җитәкчелегендә нәтиҗәле эшли алачагына, ведомствога йөкләнгән барлык бурычларны үти алачагына, заказчылар, башка ведомстволар, ТР Дәүләт заказы агентлыгы һәм башкалар белән үзара хезмәттәшлекне оештыра алачагына ышаныч белдерде.

Рөстәм Нигъмәтуллин ассызыклаганча, Сатып алулар буенча дәүләт комитеты эше җиңел түгел, чөнки бер яктан сатып алулар процессын контрольдә тотарга кирәк, икенче яктан җитештерүне яки дәүләт хакимияте органнары эшен туктатмаска кирәк. "Марат Зыятдиновның тәҗрибәсе һәм белеме бөтен коллективның алга таба уңышлы һәм максатчан эшенә ярдәм итәр дип уйлыйм", - диде Татарстан Республикасы Хөкүмәте вице-премьеры. Ул ТР Сатып алулар буенча дәүләт комитетының яңа җитәкчесенә Татарстан Республикасы башкарма хакимияте органнары вәкиле билгесен тапшырды. Җавап сүзендә Марат Зыятдинов үзенең элеккеге бөтен эшчәнлеге Югары Ослан районы белән тыгыз бәйләнгән булуын хәбәр итте. Ул ведомство эшенең иң нәтиҗәле итеп төзеләчәгенә һәм төбәкне алга таба үстерүгә юнәлдереләчәгенә ышаныч белдерде. Марат Зыятдинов шулай ук Татарстан җитәкчелегенә ышанычлары өчен рәхмәт белдерде.

Белешмә өчен: Марат Галимҗан улы Зыятдинов 1970 елның 16 августында ТАССРның Югары Ослан районы Макыл авылында туган. 1992 елда Казан дәүләт авыл хуҗалыгы академиясен «инженер-механик» белгечлеге буенча тәмамлый. 2012 елның мартыннан 2024 елның июнь аена кадәр Татарстан Республикасы Югары Ослан муниципаль районы башлыгы булып тора. Татарстан Республикасының Атказанган авыл хуҗалыгы хезмәткәре (2008 ел). 2024 елның июненнән - Сатып алулар буенча ТР дәүләт комитеты җитәкчесе.