Рөстәм Миңнеханов Сербия Республикасы Президенты Милорад Додик белән очрашты

Татарстан Рәисе Рөстәм Миңнеханов Сербия Республикасы Президенты Милорад Додик белән очрашты. Очрашу ПХИФ кырларында узды.

Республика Рәисе Президентның Россия Федерациясе белән хезмәттәшлек мәсьәләсе буенча эзлекле позициясе өчен рәхмәт белдерде. "Безнең хезмәттәшлек мөмкинлекләре, беренче чиратта, икътисад өлкәсендә зур", - дип ассызыклады Рөстәм Миңнеханов. Ул хезмәттәшлек өчен перспектив юнәлешләр арасында нефть химиясе, вертолетлар төзү, автомобильләр төзү һәм алар өчен компонентлар җитештерү, энергияне сак тоту технологияләре, авыл хуҗалыгы калуын билгеләп үтте. Бүгенге көндә товар әйләнеше күрсәткечләре бик түбән, 67 мең доллардан аз гына артык.

Яклар тагын да зуррак күрсәткечләргә ирешү өчен хезмәттәшлекне киңәйтүдә кызыксынуларын ассызыкладылар.

Милорад Додик хәбәр иткәнчә, кичә ул Россия Федерациясе Президенты белән очрашкан, әңгәмәдә Татарстан белән хезмәттәшлекне киңәйтү турында да фикер алышканнар. "Владимир Владимирович хезмәттәшлек турында документны имзалау карарыбызны хуплады. Безнең хезмәттәшлекне үстерү өчен башкарган эшләрегез өчен Сезгә рәхмәт белдерәсем килә», - дип ассызыклады Сербия Республикасы Президенты.

Очрашу ахырында Рөстәм Миңнеханов һәм Милорад Додик Татарстан Республикасы (Россия Федерациясе) һәм Сербия Республикасы (Босния һәм Герцеговина) арасында Сәүдә-икътисадый, фәнни-техник, социаль һәм мәдәни-гуманитар хезмәттәшлек турында беркетмәгә кул куйдылар.