Татарстан Рәисе капиталь ремонттан соң Казанның «Яшь гвардия» балалар лагеренда булды

Татарстан Рәисе Рөстәм Миңнеханов капиталь ремонттан соң Казанның «Яшь гвардия» балалар спорт-савыктыру лагеренда булды. Аны Казан мэры Илсур Метшин, ТР спорт министры Владимир Леонов, ТР яшьләр эшләре министры Ринат Садыйков озата йөрде.

«Яшь гвардия» лагеры «Аккош күле» урман паркында 1932 елда төзелгән. Соңгы тапкыр анда реконструкция 1961 елда үткәрелгән. 9,37 гектар мәйданда эшләр үткәргәндә барлык иске биналар диярлек сүтелә. Алар урынында 10 йокы һәм 2 административ корпус төзелгән. Аларда суүткәргеч һәм канализация үткәрелгән, кер юу һәм душ бүлмәләре җиһазландырылган. Спорт инфраструктурасы тулысынча яңартылган һәм территория төзекләндерелгән.

Ел саен җәйге чорда лагерьда 4 сменада ким дигәндә 950 бала ял итә. Быел ремонттан соң лагерьның проект куәте 5 сменага һәм 1400 балага (сменасына 280 кеше) кадәр арткан.

Рөстәм Миңнеханов клубның яңа бинасын, йокы корпусларын, медицина пунктын, ашханә, беседкаларны, шулай ук футбол кырын карады.

Лагерьның беренче сменасын ачу тантанасында Рөстәм Миңнеханов Балаларны яклау көне белән котлады. „Артек“тан бернәрсә белән дә ким булмаган искиткеч лагерь. Ял оештырудан тыш, монда тренировкаларга аерым игътибар бирелә. Сез барыгыз да спортчылар. Көчле, уңышлы һәм нык булыгыз. Спортта үҗәтлек күп яктан уңышны билгели", - дип өстәде Татарстан Рәисе.

Илсур Метшин республика җитәкчелегенә балалар лагерьларын яңартуда ярдәмнәре өчен рәхмәт белдерде. "Гаилә елында без бишенче капиталь ремонтланган, бу очракта яңадан төзелгән лагерьны ачабыз. Балалар өчен монда иң уңайлы шартлар тудырылган", - диде Казан мэры.

Лагерьда яшь спортчылар дүрт спорт төре буенча әзерлек үтәләр: футбол, баскетбол, тимер аякларда йөгерү спорты һәм җиңел атлетика. Тренировкалар өчен резина белән капланган баскетбол һәм ике баскетбол-волейбол мәйданчыгы, ясалма газонлы мини-футбол мәйданчыгы, туфрак һәм ком белән капланган ике стандарт булмаган футбол кыры җиһазландырылган.