Рөстәм Миңнеханов "Мэрлар мәктәбе" федераль программасында катнашучылар белән очрашты

Бүген Казанда «Мэрлар мәктәбе» федераль программасы модуле старт алды. Муниципаль кадрлар идарәче резервын үстерү программасы Россия Халык хуҗалыгы һәм дәүләт хезмәте академиясенең (РАНХиГС) Югары дәүләт идарәсе мәктәбе тарафыннан Россия Президенты администрациясе белән берлектә эшләнгән һәм гамәлгә ашырыла.

Исегезгә төшерәбез, программа 2023 елның декабрендә старт алды. 2023-2024 уку елы кысаларында программаның 161 катнашучысы сайлап алынган, 2 тыңлаучылар агымы формалаштырылган. Беренче агымда Россия Федерациясенең барлык субъектларыннан диярлек 80 кеше белем ала.

Беренче агым тыңлаучылары өчен 2024 елның 28-31 маенда Татарстан Республикасында «Хуҗалык эшчәнлеге һәм территорияләрне үстерү» мәгариф модуле уза. Модуль кысаларында катнашучылар Казан һәм Иннополис кебек шәһәрләрдә Татарстан инфраструктурасы объектларында булачак.

Татарстан Республикасы Хөкүмәте, министрлыклар һәм ведомстволар вәкилләренең лекцияләре, шулай ук практик дәресләр, мастер-класслар һәм диалоглар каралган.

Бүген Татарстан Республикасы Рәисе Рөстәм Миңнеханов модульдә катнашучылар белән очрашты. Барысын да сәламләп, Рөстәм Миңнеханов кыскача төбәк һәм аның икътисады турында сөйләде. Ул икътисадның нигезе нефть чыгару һәм нефть эшкәртү булуын ассызыклады, берничә төп сәнәгать предприятиесен билгеләде, шулай ук кече һәм урта бизнес өчен инфраструктура үсеше турында сөйләде.

2023 елда республикада 3,4 млн кв. м торак файдалануга тапшырылган, транспорт инфраструктурасына җитди финанс чаралары кертелә.

Рөстәм Миңнеханов шулай ук «Безнең ишегалды» программасы турында сөйләде. 2023 елда 11 яңа мәктәп төзелде, дип билгеләп үтте ул.

Төбәк өчен мөһим вакыйга булып Казанга кадәр М-12 «Восток» тизйөрешле автомагистрале буенча Идел аша күпер буенча хәрәкәт ачылуы тора, дип искәртте Татарстан Рәисе.

"Без җирле үзидарә мәсьәләләренә бик игътибарлы, - диде Рөстәм Миңнеханов. - Бездә 43 муниципалитет һәм ике шәһәр округы, шулай ук 911 торак пункт бар».

Моннан тыш, бүген «Хуҗалык эшчәнлеге һәм территорияләрне үстерү» модуле кысаларында ТР Рәисе Администрациясе җитәкчесенең беренче урынбасары - ТР Рәисенең территорияләр белән эшләү идарәсе башлыгы Илнур Гарипов укыды (тема - административ-территориаль төзелеш, республика программаларын гамәлгә ашыру, Татарстан җирле үзидарә органнары эше). Лектор муниципалитетларның, халыкка иң якын хакимият дәрәҗәсе буларак, аерым ролен билгеләп үтте.

Чарада шулай ук «ТР Муниципаль берәмлекләр Советы» ассоциациясе рәисе Әгъзам Гобәйдуллин да катнашты.