Рөстәм Миңнеханов Никольское авылында Каравон халык бәйрәмендә булды

Бүген Лаеш муниципаль районының Никольское авылында Каравон рус халык бәйрәме уза.

Татарстан Республикасы Рәисе Рөстәм Миңнеханов  бәйрәм кунагы булды.

Бәйрәм мәйданчыгына килү белән Рөстәм Миңнеханов декоратив-кулланма сәнгать осталары күргәзмәсен карады, халык-сәнгать кәсепләре осталары эшләре белән танышты,ал куагыннан төрле әйберләр үрү, тукыма туку, чүлмәкчелек һәм агачтан уеп ясау буенча мастер-классларда булды.

Исегезгә төшерәбез, Каравон-2024 чараларында халык башкаручылары һәм этнографик ансамбльләр, Татарстаннан һәм Россия Федерациясе төбәкләреннән 170тән артык коллектив катнаша.

Бәйрәм кунаклары өчен халык уеннары, сәнгать кәсепләре буенча мастер-класслар, театральләштерелгән тамашалар, аерым башкаручылар һәм ансамбльләр чыгышлары оештырылган. Шулай ук барысын да рус миченнән чыккан сыйлар, традицион ашлар, осталарның һәм һөнәрчеләрнең халык сәнгать кәсепләре эшләнмәләре, Каравон бәйрәменең исемле эшләнмәләре көтә.

Рөстәм Миңнехановны мәйданчыкларны карауда Татарстан Республикасы мәдәният министры Ирада Әюпова, Татарстан Республикасы Рус милли-мәдәни берләшмәсе рәисе Ирина Александровская озата йөрде.

Фольклор бәйрәмендә көн дәвамында 20ләп мәйданчык эшли: «Татарстанның һөнәрчелек шәһәре», «Петрушка театры», «Иске һөнәрләр», «Ярминкә сәхнәсе», «Яшел Алан», «Хороводная поляна», «Традицион кухня» һ. б.

Бәйрәмнең трансляциясе "Мәдәният.РФ" порталында оештырылган - рус мәдәниятен яратучыларның барысы да Каравонда виртуаль катнашучылар була ала.

Бәйрәмнең төп сәхнәсендә Каравонның театральләштерелгән прологы узды.

Исегезгә төшерәбез, бәйрәмнең концерт программасының махсус кунаклары - «Оттава Е» фолк-төркеме һәм Татьяна Куртукова.