Рөстәм Миңнеханов РФ Хөкүмәте вице-премьеры Марат Хөснуллинның Кыргызстан Республикасы Министрлар Кабинеты Рәисенең беренче урынбасары Адылбәк Касыймалиев белән очрашуында катнашты

Бүген Татарстан Республикасы Рәисе Рөстәм Миңнеханов Россия Федерациясе Хөкүмәте Рәисе урынбасары Марат Хөснуллинның Кыргызстан Республикасы Министрлар Кабинеты Рәисенең беренче урынбасары Адылбәк Касыймалиев белән очрашуында катнашты.

Очрашу «Россия - Ислам дөньясы: KazanForum» халыкара икътисадый форумы кысаларында «Казан Экспо» ХКҮ мәйданчыгында узды. Киләчәктә берничә юнәлеш буенча хезмәттәшлек итү, икътисадый, фәнни, мәдәни тармакларда элемтәләрне киңәйтү мәсьәләләре тикшерелде.

Очрашуны ачып, Россия Хөкүмәте Рәисе урынбасары Марат Хөснуллин Кыргызстанның Россиянең стратегик партнерларының берсе булуын билгеләп үтте. Россия белән Кыргызстан арасында товар әйләнеше үсеш динамикасына ия, диде ул. Аерым игътибарга лаек юнәлешләр арасында Марат Хөснуллин транспорт өлкәсендә хезмәттәшлекне билгеләде. Без "Төньяк-Көньяк" транспорт коридоры проектына зур әһәмият бирәбез, диде Россия Хөкүмәте вице-премьеры. Ул шулай ук Россия ягы алга таба да Кыргызстан Республикасы белән үзара файдалы элемтәләрне үстерергә әзер булуын ассызыклады.

Кыргызстан Республикасы Министрлар Кабинеты Рәисенең беренче урынбасары Адылбәк Касыймалиев Казанда җылы кабул итүләре һәм гомумән «Россия - Ислам дөньясы: KazanForum» халыкара икътисадый форумы чараларында катнашучы кыргыз делегациясе визитын оештыруның югары дәрәҗәсе өчен рәхмәт белдерде. Ул шулай ук берничә сәнәгать предприятиесендә булуын хәбәр итте. "Безгә Татарстанның кайбер предприятиеләрендә булу мөмкин булды", - диде Адылбәк Касыймалиев һәм партнерлык элемтәләрен үстерүгә кызыксыну белдерде.

Рөстәм Миңнеханов, үз чиратында, Адылбәк Касыймалиевка «Россия – Ислам дөньясы: KazanForum» халыкара икътисадый форумында катнашуы өчен рәхмәт белдерде.

Ул шулай ук быел февраль аенда Татарстанның Кыргызстан Республикасы Президенты Садыр Нургожой улы Җаппаровны кабул итүен искәртте, ул физик спорт һәм киберспорт дисциплиналарын үз эченә алган «Киләчәк уеннары» дөньядагы беренче турнирны ачу тантанасында катнашкан иде.

Рөстәм Миңнеханов шулай ук Казанда Кыргызстан Республикасы Генераль консуллыгы ачылуы өчен рәхмәт белдерде.

Безнең өчен Кыргызстан - тугандаш республика, диде Рөстәм Миңнеханов һәм шулай ук Кыргызстанның Татарстанның мөһим стратегик һәм сәүдә-икътисадый партнерларының берсе булуын билгеләп үтте. Узган 2023 елда Татарстан белән Кыргызстан арасында товар әйләнеше 170 млн АКШ долларыннан артып киткән, бу 2022 ел күрсәткечләреннән югарырак.

Безнең мөнәсәбәтләр үсеше өчен зур потенциалыбыз бар, диде Рөстәм Миңнеханов, Адылбәк Касыймалиевка мөрәҗәгать итеп, сәүдә-икътисадый өлкәдә генә түгел, кадрлар әзерләү, фән, мәдәният өлкәсендә дә.

Бергәләп эшләү өчен өстенлекле юнәлешләр арасында нефть эшкәртү һәм нефть химиясе, машина төзелеше, вертолетлар төзелеше, автомобиль төзелеше һәм автокомпонентлар чыгару, IT һәм башка югары технологияләр, медицина һәм фармацевтика. Мәгариф өлкәсендә хезмәттәшлек тә шул ук дәрәҗәдә мөһим.

Рөстәм Миңнеханов кыргыз коллегасына Кыргызстан белән хезмәттәшлек итүнең барлык проектлары һәм башлангычлары Татарстан тарафыннан хупланачагына ышандырды. Ул шулай ук Татарстанның төрле өлкәләрдә тупланган тәҗрибәсе белән уртаклашырга әзер булуын билгеләп үтте.