Рөстәм Миңнеханов «Газпром межрегионгаз " ҖЧҖ генераль директоры Сергей Густов белән очрашты

Татарстан Рәисе Рөстәм Миңнеханов «Газпром межрегионгаз» ҖЧҖ генераль директоры Сергей Густов белән очрашты. Очрашу ТР Хөкүмәте Йортында узды. Очрашуда шулай ук «Газпром трансгаз Казан» ҖЧҖ генераль директоры Рөстәм Усманов һәм «Газпром межрегионгаз Казан» АҖ генераль директоры Айдар Таһиров катнашты.

Моңарчы Түбән Кама районында социаль газлаштыру программасы кысаларында газ җибәрү тантанасы уды. "Бу бик мөһим вакыйга. Инфраструктураны, шул исәптән газ белән тәэмин итүне үстерү - гражданнарыбыз өчен уңайлы шартлар тудыруда мөһим эш», - дип ассызыклады ТР Рәисе.

Рөстәм Миңнеханов билгеләп үткәнчә, «Газпром» белән хезмәттәшлек Татарстан икътисадының уңышлы үсешен тәэмин итә. Газны тотрыклы китерү Татарстан сәнәгать предприятиеләренең тотрыклы эшенең, перспективалы инвестицион проектларны гамәлгә ашыруның нигезе булып тора. "Бездә Түбән Кама төене зонасын һәм гомумән Кама агломерациясен киңәйтү буенча планнар бар. Шулай ук "Аммоний" һәм нефть эшкәртү предприятиеләре буенча зур планнар. Республиканың алга таба үсеше - нефть химиясе комплексы һәм машина төзелеше үсеше», - диде республика Рәисе.

Сергей Густов үз чиратында Татарстан җитәкчелегенә нәтиҗәле хезмәттәшлек өчен рәхмәт белдерде. "Татарстан безнең өчен - Россиянең иң әһәмиятле төбәкләренең берсе, без уртак эшебезне еш кына мисал итеп китерәбез. Бүгенге көндә республикада газлаштыру 97,6%ка җитә - бу иң югары күрсәткеч. Республиканы газлаштырып бетерү планы расланды. Хәзер 10 торак пункт буенча эшләр бара - бу 7,5 меңнән артык кеше. Гомумән алганда, төбәктә газлаштырып бетерү программасы буенча 28 мең 720 гариза кабул ителгән, аларның барысы да диярлек килешүләргә рәсмиләштерелгән – 27 мең 825. 18,5 мең йорт газ белән тәэмин ителгән. Быелгы план үтәләчәк дип ышанам«, - диде "Газпром межрегионгаз" ҖЧҖ генераль директоры.

Тагын бер мөһим проект - «Казанкомпрессормаш» сынау үзәгенә газүткәргеч төзү, анда нефть һәм газ химиясе заводлары өчен зур куәттәге илебезнең яңа газ турбиналары сыналачак. "Бу уникаль Россия технологияләре. Ел ахырына әлеге объектны төзербез дип уйлыйм", - дип өстәде Сергей Густов.

Очрашуда республикада, шул исәптән социаль объектлар һәм бакчачылык ширкәтләре буенча газлаштыру динамикасы, Татарстанны газ белән тәэмин итүне үстерү программасын алга таба гамәлгә ашыру, шулай ук кулланучыларның түләү дисциплинасы турында фикер алыштылар.