Рөстәм Миңнеханов KazanForum һәм «Изге Болгар җыены" чараларын оештыру турында: Болар барысы да ышанычлы һәм югары дәрәҗәдә эшләргә тиеш

Татарстан Республикасы Рәисе Рөстәм Миңнеханов хокук саклау органнарына, муниципаль берәмлекләр башлыкларына, республика активына һәм 9 Май Җиңү көненә багышланган бәйрәм чараларына җәлеп ителгән министрлыклардан һәм ведомстволардан барлык оештыручыларга рәхмәт белдерде. Бу хакта ул бүген ТР Хөкүмәте Йортында узган традицион шимбә киңәшмәсендә хәбәр итте.

"9 Майда без бөтен ил белән Совет халкының Бөек Ватан сугышында Җиңүенең 79 еллыгын билгеләп үттек, барлык шәһәрләрдә һәм районнарда бәйрәм чаралары узды, аларда 217 мең кеше катнашты, - диде Рөстәм Миңнеханов. - Хокук саклау органнарына-иминлекне тәэмин иткән өчен, муниципаль берәмлекләр башлыкларына, республика активына һәм җәлеп ителгән министрлыклардан һәм ведомстволардан барлык оештыручыларга рәхмәт белдерәсем килә».

Рөстәм Миңнеханов искәрткәнчә, киләсе атнада республикада " Россия-Ислам дөньясы. KazanForum» башланып китә. Ул билгеләп үткәнчә, форумда дөньяның 80нән артык иленнән, Россия Федерациясенең 80нән артык төбәгеннән вәкилләр катнашачак.

KazanForum программасы кысаларында федераль дәрәҗәдәге һәм чит илләр җитәкчеләре катнашында 170тән артык чара, 140тан артык эшлекле сессия үткәрү планлаштырыла.

Моннан тыш, Рөстәм Миңнеханов искә төшергәнчә, 19 майда "Изге Болгар җыены" тантаналы чарасы (Идел буе Болгариясе тарафыннан Ислам динен кабул итүгә багышланган традицион колачлы тантаналы чара) узачак.

ТР Рәисе хәбәр иткәнчә, бәйрәм кунаклары - Россия мөселман өммәте лидерлары, бөтенроссия дин әһелләре «Россия – Ислам дөньясы. KazanForum» форумында катнашучылар.

"Хокук саклау органнарында, төбәкнең транспорт системасында, кунакчыллык индустриясендә зур йөкләнеш булачак, - дип ассызыклады Рөстәм Миңнеханов. - Болар барысы да ышанычлы һәм югары дәрәҗәдә эшләргә тиеш".