Kazan FORUMга 80 илдән 11 меңгә якын катнашучы теркәлгән

Kazanforumга 80 илдән 11 меңгә якын катнашучы теркәлгән. Бу соңгы сан түгел. Бу хакта Татарстан Республикасы Хөкүмәте Йортында узган брифингта Татарстан Республикасы Инвестицион үсеш агентлыгы җитәкчесе Талия Миңнуллина белдерде.

"Инде 11 меңгә якын теркәлгән катнашучы бар. Без бу санның соңгысы түгеллеген аңлыйбыз. Теркәлү 6 майга кадәр дәвам итәчәк, шуңа күрә соңгы көннәрдә гадәттәгечә катнашучылар саны артуын көтәбез», – диде республиканың Инвестицион үсеш агентлыгы башлыгы.

Талия Миңнуллина искәрткәнчә, KazanForum федераль статусын алганчы катнашучылар саны 7 меңгә җиткән.

Катнашучылар арасында ВИП-кунаклар көтелә, шул исәптән Кыргызстан Министрлар Кабинеты Рәисе Акылбәк Җаппаров, төркмән халкының милли лидеры Гурбангулы Бердымөхәммедов, Министрлар Кабинеты Рәисе урынбасары, Төркмәнстанның Тышкы эшләр министры Рәшид Мәрәдов, Кувейтның Нефть министры Имад Әл Атики, Үзбәкстанның Мәшгульлек һәм ярлылыкны киметү министры Бехзода Мусаев, Әфганстанның Сәнәгать һәм сәүдә министры Нуреддин Азизи, Әфганстанның Транспорт һәм граждан авиациясе министры Хәмидулла Ахундзадә Сәед, Берләшкән Гарәп Әмирлекләренең Икътисад министры урынбасары Абдулла Әлсалеха, Катарның Идарәче гаиләсе әгъзасы Мөхәммәд Нассен Әл Мәлики һәм башка кунаклар.

Талия Миңнуллина өстәп әйткәнчә, иң күп санлы делегацияләрне Мисыр, Индонезия, Казахстан, Ливия, Малайзия, Согуд Гарәбстаны, Сенегал, Төркмәнстан, Үзбәкстаннан көтәләр. Шулай ук форумга Россия Федерациясенең 80 субъекты вәкилләрен дә килергә тиеш.

Элегрәк «Россия – Ислам дөньясы: KazanForum» халыкара икътисадый форумының рәсми сайтында чараның киңәйтелгән эшлекле программасы басылып чыкты. Форумның төп темасы «Ышаныч һәм хезмәттәшлек» булды. Эшлекле программа берничә тематик трекны берләштерәчәк: халыкара хезмәттәшлек, туризм, бизнес, фән һәм технологияләр, ислам финанслары һәм инвестицияләре, спорт, хәләл индустрия һ.б. Программада Россия төбәкләреннән, Ислам хезмәттәшлеге оешмасы илләреннән һәм башка дәүләтләрдән экспертлар катнашында барлыгы 125 тематик сессия карала.

Татарстан Республикасы Премьер-министры урынбасары - Татарстан Республикасы икътисад министры Мидхәт Шаһиәхмәтов хәбәр иткәнчә, Татарстан һәм Ислам Хезмәттәшлеге Оешмасы илләренең товар әйләнеше сизелерлек арткан. 2023 елда ул 5,7 миллиард доллар тәшкил иткән.

Шулай ук Мидхәт Шаһиәхмәтов «Россия-Ислам дөньясы: KazanForum 2024» халыкара икътисадый форумында партнерлык финанслауга кагылышлы ике ИТ-продуктның презентациясен игълан итте. "Без ислам финанслау нормалары буенча эшкуарлар өчен электрон сәүдә мәйданчыгын тәкъдим итәбез. Шулай ук без ислам мәгълүмат порталын тәкъдим итәчәкбез, анда мәгълүмати-укыту материаллары, базарда катнашучыларның финанс тәкъдимнәре бар, финанс продуктларын рәсмиләштерүгә гариза калдыру мөмкинлеге бар», - дип белдерде ТР икътисад министры.

Аерым алганда, порталда партнерлык финанслары темасын үзлегеннән өйрәнергә мөмкинлек бирүче белем базасы булачак. Анда бу тема буенча уку курслары турында мәгълүмат та тәкъдим ителәчәк.   "Бу модульдә без халыкка, бизнес өчен ислам финанслау кораллары турында аңлаешлы мәгълүмат бирәбез", - дип өстәде М. Шаһиәхмәтов.

Порталда тагын бер тәрәзә режимында партнерлык финанслары базарында катнашучыларна нинди банк продуктлар тәкъдим итәчәге белән танышу һәм аларны алу мөмкинлеге булачак. Мәсәлән, әгәр кеше шәригать нормалары буенча фатир сатып алырга тели икән, моны портал аша эшләргә мөмкин булачак, ул конкрет кешене кирәкле хезмәтләр күрсәтүче конкрет банкка алып барачак.

«Россия - Ислам дөньясы: KazanForum 2024» халыкара икътисадый форумы Татарстан башкаласында 14-19 майда «Казан Экспо» ХКҮмәйданчыгында узачак. Икенче ел вакыйга федераль масштабтагы форум булып тора, бу күпкә күбрәк катнашучыларны җәлеп итәргә ярдәм итә.