Рөстәм Миңнеханов татар зыялылары вәкилләре белән очрашты

Бүген Татарстан Республикасы Рәисе Рөстәм Миңнеханов Туган тел көне һәм Татар әдәбияты классигы Габдулла Тукайның туган көне уңаеннан татар зыялылары вәкилләре белән очрашты. Очрашу Казан Кремленең гавами урыннарында узды.

Чара башланыр алдыннан Рөстәм Миңнеханов татар яшьләре журналлары һәм балалар китап продукциясе күргәзмәсен карады, шулай ук «Апуш» татар балалар театр студиясенең яшь актерлары белән аралашты.

Очрашуда катнашучыларны сәламләп, Рөстәм Миңнеханов барысын да Туган тел көне белән котлады. Республика Рәисе билгеләп үткәнчә, Татарстанда татар телен, милли гореф-гадәтләрне һәм татар мәдәниятен саклау мәсьәләләренә зур игътибар бирелә. Бу юнәлештә ТР Дәүләт Советы Рәисе урынбасары Марат Әхмәтов җитәкчелегендәге махсус Комиссия зур эш алып бара. "Үзенең нәтиҗәле эше аркасында комиссия зур абруй казанды. Без сезнең эшегезнең уңай нәтиҗәләрен күрәбез», - дип ассызыклады ТР Рәисе.

Әңгәмә барышында очрашуда катнашучылар берничә актуаль тема, шул исәптән балалар һәм яшьләр театр коллективларының иҗади проектларын үстерү турында фикер алыштылар. Мәсәлән, «Апуш» театр берләшмәсенең сәнгать җитәкчесе Алия Фәйзерахманова студия тәҗрибәсен Татарстанның башка торак пунктларына татартырга, шулай ук конкурс нигезендә балалар театр студияләре спектакльләренә грантлар бүлеп бирергә тәкъдим итте. Рөстәм Миңнеханов конкурсны оештыру буенча тәкъдимнәр кертергә кушты.

«Татар сүзе» нәфис сүз конкурсында җиңүче Аяз Әһлиуллин «ШАЯН Мультфильм» студиясен ачу мөмкинлеген карауны һәм төрле кызыклы проектлар булдыруны хуплауны сорады. Бүгенге көндә булачак студиянең берничә проекты эшләнгән. Татарстан Рәисе әлеге проектларны өйрәнергә йөкләмә бирде.

Татар телле блогер Илнар Идрисов Татарстанда яшәүче төрле халыкларның милли блогерлары өчен медиамәктәп турында сөйләде һәм әлеге проектны дәвам итүдә ярдәм күрсәтүне сорады. Рөстәм Миңнеханов бу инициативаны хуплады. "Бу перспективалы юнәлеш. Яшьләр белән эшләү бик мөһим", - дип ассызыклады ул.

Алена Батуллина «Чисто-чиста» балалар театр проектын тәкъдим итте, аның кысаларында спектакльне булдыруда Татарстан авылларыннан профессиональ булмаган артистлар - мәктәп укучылары катнаша. Проектны оештыручы республика Рәисен театр студиясенә килергә чакырды.

М. Мозаффаров исемендәге 18 нче Казан балалар музыка мәктәбе директоры Илзия Фәтхуллина классик татар музыка әсәрләрен популярлаштыру өчен бүгенге көндә нота архивларында саклана торган эшләрне цифрлаштырырга кирәклеген билгеләп үтте. Рөстәм Миңнеханов әлеге эшне оештырырга күрсәтмә бирде.

«Идел» - «Идель» журналының баш мөхәррире Рәмзия Галимова вакытлы матбугат басмаларын реализацияләүгә бәйле проблеманы билгеләде. Аның сүзләренчә, бүген яшьләр өчен журналлар сатып алу өчен уңайлы урыннар юк. Яшьләрнең күпләп яшәү урыннары - югары уку йортлары һәм урта махсус уку йортлары. Рәмзия Галимова әлеге уку йортларында вендинг аппаратларын урнаштыруда ярдәм итүне сорады. Рөстәм Миңнеханов яшьләр матбугатын тарату нокталарын булдыру буенча тәкъдимнәр кертергә кушты. "Без ярдәм итәчәкбез, ләкин бу басмалар файдалы булырга тиеш. Эчтәлек бик мөһим», - диде ТР Рәисе.

«Салават күпере» журналының, «Сабантуй» газетасының баш мөхәррире Зилә Фәйзуллина уеннар һәм видеолар булган журналларның мультимедия форматын реализацияләү турында сөйләде. "Салаватик" медиамәктәбенең уникаль видеоконтент эше оештырылган. Рөстәм Миңнехановтан видео төшерү, аудио яздыру һәм балалар өчен дәресләр өчен биналарны җиһазландыруда ярдәм итүләрен сорадылар. Бу проектка тагын да күбрәк балаларны җәлеп итәргә мөмкинлек бирәчәк. Республика Рәисе әлеге проектны хуплады.

Композитор Риф Гатауллин Татарстан Республикасының үзешчән композиторлары антологиясен булдыру идеясе турында сөйләде. Рөстәм Миңнеханов бу эшкә республиканың Мәдәният министрлыгына да кушылырга чакырды.

Шулай ук Татарстан Рәисен «Ялкын» журналының 100 еллыгы уңаеннан бәйрәмгә чакырдылар.

Очрашу ахырында Рөстәм Миңнеханов Татарстанда яшәүче барлык халыкларның телләрен саклау һәм үстерүнең мөһимлеген тагын бер кат билгеләп үтте. "Бу эштә булган барлык кораллар да мөһим. Безгә китаплар, мультфильмнар, театрлар кирәк. Әмма, әлбәттә, туган телне саклауда гаилә мөһим роль уйный. Әгәр ата-аналар туган телдә сөйләшә икән, балалар да үз халкының рухи кыйммәтләрен  беләчәк», - дип өстәде Рөстәм Миңнеханов.