Рөстәм Миңнеханов Казан Богородица монастыре территориясендәге объектларны карады

Бүген Татарстан Республикасы Рәисе Рөстәм Миңнеханов Казан Богородица монастыренда булды.

Казан һәм Татарстан митрополиты Кирилл озатуында ул монастырь территориясен карады, биредә урнашкан кайбер объектларның торышы белән танышты. Аерым алганда, Рөстәм Миңнехановка Никола Тульский гыйбадәтханәсе бинасын һәм настоятель корпусын, сестрин корпусы бинасын һәм чиркәү-приход мәктәбе бинасын күрсәттеләр. Биналарны торгызу тәкъдир ителде.

Николай Тульский гыйбадәтханәсе Казанда 1552 елдан соң төзелгән беренче гыйбадәтханәләрнең берсе булган дип санала. Соңрак гыйбадәтханә күп тапкырлар янган яки сүтелгән, ләкин яңадан төзелгән. Совет чорында бинаны үзгәртеп корып, гөмбәзен сүтәләр, өстәмә кат төзеп бетерәләр. 2005 елга кадәр биредә элеккеге тәмәке фабрикасы цехлары урнашкан. Хәзерге вакытта архитектура һәйкәле авария хәлендә. Проект-смета документациясен эшләүгә акча бүлеп бирелгән.

Янәшәдә урнашкан настоятель корпусы да авария хәлендә һәм торгызуны таләп итә (бөтен монастырь комплексын торгызу кысаларында). Бу объект өчен шулай ук проект-смета документациясен эшләү өчен акча бүлеп бирелгән.

Сестрин корпусы бинасы Казан монастыре ансамблендә 1832-1843 елларда барлыкка килә, бу архитекторлар А.К. Шмидт һәм Я. Шелковников эше. Совет чорында бина үзгәртеп корылган, анда 2005 елга кадәр элеккеге тәмәке фабрикасы тулай торагы урнашкан.

Рөстәм Миңнеханов караган дүртенче объект - чиркәү-приход мәктәбе бинасы. Император Александр III истәлегенә бу чиркәү-приход мәктәбе Казан Богородица монастыренда 1896 елда ачылган. 1900 елдан 1928 елга кадәр биредә алтынлап тегү остаханәсе урнашкан. Монастырь ябылганнан соң, бу бинада төрле учреждениеләр урнашкан (киностудия павильоны, тәмәке фабрикасы объектлары, педагогия институты биналары һ.б.). Хәзер бу бина да авария хәлендә, бөтен монастырь комплексын торгызу кысаларында торгызу таләп ителә.

Рөстәм Миңнехановка хәбәр итүләренчә, хәзерге вакытта әлеге объектларны тикшерү эшләре бара.

Татарстан Рәисе бүгенге көндә каралган барлык объектлар өчен документлар әзерләргә кушты. "Документлар кирәк", - диде ул. - Объектларны торгызу өчен нинди чаралар кирәклеген белер өчен кирәк».

"Бу объектларны торгызу – Аллага яраклы эш", - дип йомгаклады Рөстәм Миңнеханов.

Казан һәм Татарстан митрополиты, Татарстан митрополиясе башлыгы Кирилл Рөстәм Миңнеханов белән Казан дини академиясен торгызу буенча планнары белән уртаклашты.

Казан Богородица монастыре территориясендәге объектларны карауда ТР Рәисе Администрациясе Җитәкчесе Әсгать Сәфәров, ТР төзелеш, архитектура һәм торак-коммуналь хуҗалык министры Марат Айзатуллин, ТР Мәдәни мирас объектларын саклау комитеты рәисе Иван Гущин, Казан шәһәре муниципаль берәмлеге башлыгының беренче урынбасары Денис Калинкин һәм башкалар катнашты.