Рөстәм Миңнеханов һәм Игорь Левитин Саба районында өстәл теннисы буенча халыкара турнирда җиңүчеләрне бүләкләделәр

Байлар Сабасы шәһәр тибындагы бистәдә өстәл теннисы буенча халыкара ярышлар һәм XXII ачык шәхси-команда республика ярышлары тантаналы рәвештә ябылды. Тантанада Татарстан Республикасы Рәисе  Рөстәм Миңнеханов, РФ Президенты ярдәмчесе, Россия Олимпия комитетының беренче вице-президенты Игорь Левитин һәм Саба районы башлыгы Рәис Миңнеханов катнашты.

7-10 мартта узган турнир РФ Спорт министрлыгының рәсми календарь планына кертелгән. Ярышлар 22 ел рәттән үткәрелә. Быел алар халыкара статуска ия булдылар. Ярышларда Россия, Беларусь Республикасы, Таҗикстан һәм Кытайдан 278 иң көчле спортчы катнашты.

Рөстәм Миңнеханов спортчыларга турнирда катнашулары һәм  ярышларның югары дәрәҗәдә әзерлеге өчен  оештыруларга рәхмәт белдерде. "Без әлеге ярышларны инде 22 ел үткәрәбез. Без киләчәктә дә бу яхшы традицияне дәвам итәрбез һәм киләсе елда сезнең белән очрашырбыз дип өметләнәм», - дип мөрәҗәгать итте ТР Рәисе катнашучыларга.

"Сезне халыкара статуска ия булган һәм ел саен уздырылучы турнирда сәламләвемә шатмын. Барлык спортчыларга да рәхмәт әйтәсем килә. Сезнең өчен мөмкин кадәр күбрәк ярышлар булсын дип без барысын да эшләячәкбез. Җәй көне Казанда БРИКС уеннары узачак, аның кысаларында 4 комплект медаль өстәл теннисы буенча уйнатылачак», - дип билгеләп үтте Игорь Левитин.

Аннары Рөстәм Миңнеханов һәм Игорь Левитин турнирда җиңүчеләрне һәм призерларны бүләкләделәр.

Аннары Татарстан Рәисе һәм Россия Президенты ярдәмчесе Лесхоз бистәсенә бардылар һәм РСФСР һәм ТАССРның атказанган урманчысы, «Почет Билгесе» һәм «Октябрь Революциясе» орденнары кавалеры Нургали Миңнеханов һәйкәленә чәчәкләр салдылар.