Рөстәм Миңнеханов «Ак Барс" хоккей клубы белән очрашуда: Сезнең өчен Татарстанда гына түгел, республикадан читтә дә җан аталар

Татарстан Республикасы Рәисе Рөстәм Миңнеханов Казанның «Ак Барс» хоккей клубы уенчылары һәм тренерлар штабы белән очрашты. Очрашу «Татнефть Арена»да 2023/2024 елгы КХЛ сезонының плей-офф старты алдыннан узды.

"Яхшы традиция бар - без сезнең белән плей-офф алдыннан очрашабыз. Хәзер барысы да яңадан башлана. Бернинди киртәләр юк, бары тик җиренә җиткереп уйнарга гына кирәк. Без сезнең тугры җанатарларыгыз. Команданың уңышлары - безнең уңышлар, сезнең проблемалар - безнең проблемалар. Иң мөһиме, имгәнүләр булмасын. Әлбәттә, һәр команда беренче булырга омтылачак. Без сезгә зур хөрмәт белән карыйбыз. Сезнең өчен Татарстанда гына түгел, республикадан читтә дә җан аталар. Без 1әрвакытсезнең белән. Сезнең һәрберегез үз эшенең профессионалы. Хәерле юл!"- дип ассызыклады Рөстәм Миңнеханов.

«Ак Барс»ның баш тренеры Зинәтулла Биләлетдинов республика җитәкчелегенә командага ярдәм иткәне өчен рәхмәт белдерде. "Плей-офф - хоккейның зур бәйрәме. Барлык командалар да үз көчләрен кызганмыйча җиңүгә омтылачак. Без моңа әзер дип саныйм. Берләшергә һәм бердәм команда белән максатка барырга кирәк", - диде ул.

Татарстан спорт министры билгеләп үткәнчә, «Киләчәк уеннары» ярышлары вакытында команда вакытлыча Спорт сараена күченеп торды. "Командага һәм тренерлар штабына безне аңлаганнары, иске сараебызга кайтканыбыз өчен рәхмәт белдерәсем килә. Уңышлы әйләнеп кайттылар - дүрт уенның өчесендә җиңү яуладылар. Безнең өчен "Ак Барс" хоккей клубы - республиканың символы, бренды. Спортчыларыбызга ышаначакбыз һәм алар өчен җан атачакбыз", - дип өстәде Владимир Леонов. 

Очрашу ахырында команда капитаны Александр Радулов Рөстәм Миңнехановка плей-оффка махсус әзерләнгән клуб символикасы белән спорт толстовкасын тапшырды.

Гагарин кубогының 1/8 финалында «Ак Барс" «Автомобилист» белән очрашачак. Беренче уен иртәгә, 29 февральдә, «Татнефть Арена» бозында узачак.