Рөстәм Миңнеханов Иранның Тышкы эшләр министрлыгында Казанда БРИКС илләре саммиты кысаларында узачак вакыйгаларны тәкъдир итте

Татарстан Республикасы Рәисе Рөстәм Миңнеханов Тәһранга эш сәфәре кысаларында Иранның Тышкы эшләр министрының сәяси мәсьәләләр буенча урынбасары Али Бәһәри һәм Иранның Тышкы эшләр министры урынбасары, Иранның БРИКС шәһәрендәге шерпасы (ышанычлы кешесе) Мәһди Сәфәри белән очрашты.

Иранның Тышкы эшләр урынбасарлары белән очрашулар барышында Рөстәм Миңнеханов хәбәр иткәнчә, Иранга дәүләт органнары һәм бизнес вәкилләреннән Татарстан делегациясе килде, алар хәзерге вакытта Исфахан провинциясендә эшлекле программа буенча эшлиләр. Иртәгә анда «Исфахан - Татарстан» эшлекле форумы узачак, анда Исфахан Губернаторы Реза Мортазави катнашыр дип көтелә.

"Россия Федерациясе һәм Иран – кискен халыкара проблемаларны хәл итүдә уртак караш берләштергән күптәнге һәм якын партнерлар. Халыкара мөнәсәбәтләрдәге кризис шартларында безнең илләр хезмәттәшлеге аеруча кыйммәтле һәм актуаль була бара. Безнең дәүләтләр лидерлары даими диалогны саклыйлар, үзара визитлар ясыйлар», - дип ассызыклады Татарстан Республикасы Рәисе һәм, Россия белән Иран арасында товар әйләнеше ел саен үсеш күрсәтә, дип билгеләп үтте.

"Үз чиратында, Татарстан Россия-Иран элемтәләрен үстерүгә үз өлешен кертергә тырыша. Мин сезнең илгә һәрвакыт рәхәтләнеп киләм. Бездә Тәһран белән дә, Иранның Көнчыгыш Әзеәрбайҗан, Хөрәсән-Резави, Гөлестан, Гыйльян һәм башка күп кенә провинцияләре белән дә яхшы диалог урнаштырылган», - диде Рөстәм Миңнеханов.

Әңгәмә барышында Рөстәм Миңнеханов Татарстанның сәнәгать һәм инвестицион потенциалы турында кыскача сөйләде, илнең төп социаль-икътисадый күрсәткечләрен әйтте, шулай ук 2024 елда Казанда узачак халыкара форумнарны һәм вакыйгаларны тәкъдир итте. Бу шул исәптән "Киләчәк уеннары" халыкара фиджитал ярышлары , "Россия Ислам дөньясы: KazanForum" халыкара икътисадый форум һәм XVI БРИКС илләре саммиты, анда 2024 елда Россия рәислек итә. Татарстан Рәисе билгеләп үткәнчә, саммит кысаларында Россиядә узачак 200дән артык чараның шактый зур өлешен, шул исәптән БРИКС илләренең спорт уеннарын Казан кабул итәчәк.

Иран Тышкы эшләр министры урынбасары Мәһди Сәфәри белән әңгәмә вакытында Рөстәм Миңнеханов кайбер вакыйгаларга аерым игътибар бирде. "Сез - БРИКС берләшмәсендә Иранның шерпасы (ышанычлысы). Сезнең ил 2024 елның 1 гыйнварыннан БРИКСның рәсми әгъзасы булды. Безнең илдә, шул исәптән Татарстанда да, БРИКС линиясе буенча күп вакыйгалар узачак. Ә Дәүләт башлыклары саммиты, анда без Иран Президентын хөрмәтле Рәиси әфәндене көтәбез, быелның октябрендә Казанда узачак. Бу чараларны әзерләү кысаларында без сезнең белән күп хезмәттәшлек итәчәкбез дип ышанам», - дип искәртте ул һәм Иран Тышкы эшләр министры урынбасары Мәһди Сәфәригә бу очрашу мөмкинлеге өчен рәхмәт белдерде.

Мәһди Сәфәри шулай ук озак еллар Иранның Россиядәге илчесе булып эшләвен һәм Россия Федерациясенә тирән хөрмәт һәм аңлау белән каравын хәбәр итте.

Моннан тыш, Рөстәм Миңнеханов белән очрашу барышында Сәфәри әфәнде Татарстанның беренче Президенты – ТР Дәүләт Киңәшчесе Минтимер Шәймиев белән шәхсән таныш булуын һәм берничә тапкыр аралашуын билгеләп үтте. Мәһди Сәфәри Минтимер Шәймиевка тирән хөрмәт һәм нык сәламәтлек теләвен җиткерүне сорады.

Очрашуда Россия Федерациясенең Иран Ислам Республикасындагы Гадәттән тыш һәм Тулы вәкаләтле илчесе Алексей Дедов та катнашты.