Татарстан Республикасы Рәисе Ислам Республикасына эш сәфәренә килде

Бүген кич Татарстан Республикасы Рәисе Рөстәм Миңнеханов Иран Ислам Республикасына эш сәфәренә килде. Аның сәфәре программасында Тәһран башкаласында һәм Исфахан шәһәрендә рәсми очрашулар һәм эшлекле сөйләшүләр планлаштырылган. Татарстан Республикасы Рәисен Тәһран халыкара аэропортында Россия Федерациясенең Иран Ислам Республикасындагы Гадәттән тыш һәм Тулы вәкаләтле илчесе Алексей Дедов, Иранның Сәнәгать, рудниклар һәм сәүдә министры урынбасары Мәһди Зәйгами һәм башка рәсми затлар каршы алды.

Иртәгә визитның беренче көнендә Рөстәм Миңнеханов Тәһранда Иран Ислам Республикасы Хөкүмәте рәсми затлары белән сөйләшүләр уздырырга планлаштыра. Аерым алганда, Иранның Нефть министры, Сәүдә-икътисадый хезмәттәшлек буенча даими Россия-Иран комиссиясе рәистәше Җәүдәт Оуҗи, Иранның Сәнәгать, рудниклар һәм сәүдә министры Аббас Алиәбәди, Иранның Тышкы эшләр министры урынбасары, Иранның БРИКСтагы шерпасы (ышанычлы кешесе) Мәһди Сәфәри һәм башкалар белән очрашулар көтелә.

Эш сәфәре программасының икенче көнендә Исфахан шәһәрендә Исфахан провинциясе Губернаторы Реза Мортазави белән очрашу планлаштырылган. Исфаханның Сәүдә-сәнәгать палатасында «Исфахан-Татарстан» төбәкара эшлекле форумы узачак, анда ике ил - Иран һәм Россиянең  алдынгы төбәкләренең дәүләт структуралары һәм эшлекле даирәләре вәкилләре бер-берсенә сәүдә-икътисадый һәм сәнәгать потенциалын тәкъдим итәчәк һәм гуманитар өлкәләрдә хезмәттәшлек итү мөмкинлекләрен тәкъдим итәчәк. Шулай ук эш визиты программасында Иран ягы Көнбатыш илләр санкциясе шартларында эшкә уңышлы яраклашкан Иранның кайбер предприятиеләре эшчәнлеге белән танышуны тәкъдим итә.

2022 елда Россия һәм Иран арасында тышкы сәүдә әйләнеше 15%ка арткан һәм рекордлы күрсәткечләргә ирешкән, 4,6 млрд. АКШ доллары тәшкил иткән. 2023 елның 11 ае нәтиҗәләре буенча безнең илләр арасында товар әйләнеше 3,6 млрд АКШ доллары дип бәяләнә. Узган ел нәтиҗәләре буенча Россия Иранның төп инвесторы һәм төп тышкы сәүдә партнеры булып тора. Россиянең Ирандагы илчесе Алексей Дедов сүзләренчә, Россия белән Иран арасындагы ике яклы партнерлык турында килешү хәзерге вакытта килештерүнең соңгы стадиясендә.

Россия белән Иран арасындагы хезмәттәшлеккә Татарстан Республикасы да үз өлешен кертә. Узган елның 9 ае нәтиҗәләре буенча товар әйләнеше 2022 ел белән чагыштырганда 1,5 тапкырга арткан һәм 162 млн АКШ доллары тәшкил иткән. Татарстан һәм Иран сәүдә-икътисадый хезмәттәшлек үсеше өчен зур потенциалга ия. Безнең республика «КАМАЗ» йөк автомобильләре, вертолетлар, йөк-пассажир суднолары, нефть химиясе продукциясе һәм минераль ашламалар, нефть-газ чыгару җайланмалары һәм компрессорлар, суыткыч техника, азык-төлек һәм авыл хуҗалыгы товарлары, медицина һәм фармацевтика продукциясе белән тәэмин итү белән кызыксына.

Исегезгә төшерәбез, 2022 елның сентябрендә Рөстәм Миңнехановның Иранда эш сәфәрендә булган иде, анда ул Көнчыгыш Әзәрбайҗан, Гөлестан һәм башкала Тәһран провинцияләрендә булды. Ул вакытта губернаторлар белән очрашулар, эшлекле даирәләр белән түгәрәк өстәлләр, әйдәп баручы сәнәгать предприятиеләренә һәм эшкәртү җитештерүләренә барулар үзара сәүдә-икътисадый хезмәттәшлекнең үсешен тәэмин итте.