Рөстәм Миңнеханов һәм Төркиянең халыкара күргәзмәләрне оештыручылар ассоциациясе президенты Юныс Әте белән халыкара күргәзмә эшчәнлеге өлкәсендәге хезмәттәшлек турында фикер алышты

Бүген Татарстан Республикасы Рәисе Рөстәм Миңнеханов Discover Events компаниясе идарәсе рәисе, Төркия халыкара күргәзмәләрне оештыручылар ассоциациясе Президенты Юныс Әте белән очрашуында халыкара күргәзмә эшчәнлеген оештыру өлкәсендә хезмәттәшлек, шул исәптән «Россия – Ислам дөньясы: KazanForum» халыкара икътисадый форумына әзерлек кысаларында да фикер алышты.

Очрашу Казанда ТР Хөкүмәте Йортында Рөстәм Миңнехановның эш кабинетында узды.

Исегезгә төшерәбез, Discover Events Төркиянең күргәзмә-ярминкә чараларын оештыручы әйдәп баручы компанияләренең берсе. Компания - шулай ук Russia Halal Ехро күргәзмәсендә Төркиянең милли павильонын оештыручы.

Моннан тыш, Discover Events "Рацин" АҖ белән берлектә, "АГРОВОЛГА-2022"авыл хуҗалыгы күргәзмәсе кысаларында Төркиянең милли павильонын оештырды.

Татарстан ягыннан очрашуда Татарстан Республикасы Премьер-министры урынбасары – Татарстан Республикасы авыл хуҗалыгы һәм азык-төлек министры Марат Җәббаров, Татарстан Республикасы Инвестицион үсеш агентлыгы җитәкчесе Талия Миңнуллина һ. б. катнашты.