ТР Төзелеш министрлыгы башлыгы төзелеш һәм капиталь ремонт программалары буенча агымдагы эш турында сөйләде

2024 елда республика кимендә 3 млн 150 мең квадрат метр торак төзергә тиеш. Бүгенге көндә план 12%ка үтәлгән, 376 мең квадрат метр файдалануга тапшырылган. Бу хакта бүген ТР Хөкүмәте Йортында узган киңәшмәдә республиканың төзелеш, архитектура һәм торак-коммуналь хуҗалык министры Марат Айзатуллин хәбәр итте.

Киңәшмәне Татарстан Республикасы Рәисе Рөстәм Миңнеханов барлык муниципаль районнар белән видеоконференцэлемтә режимында уздырды.

Коммерциячел төзелеш линиясе буенча планлаштырылган күләмнең 4,5 проценты тапшырылган - бу гомуми мәйданы 66,4 мең кв. м булган 20 күп фатирлы йорт. Социаль ипотека программасы 5,3 процентка үтәлгән, 8,6 мең кв.м булган 11 йорт файдалануга тапшырылган. планның иң зур үтәлеше шәхси торак төзелеше линиясе буенча теркәлә. Статистик хисап буенча, 301 мең кв. м. яки планның 20%ы диярлек тапшырылган.

Узган елдагы кебек үк, аерым категория гражданнарны торак белән тәэмин итү буенча 4 программаны гамәлгә ашыру планлаштырыла. Быел 930 ятим бала, 5 һәм аннан да күбрәк баласы булган 28 күп балалы гаилә, 84 яшь гаилә һәм мәҗбүри күченүчеләр, Ерак Төньяктан күченүчеләр һәм чернобыльчеләр арасыннан 6 граждан торак алырга тиеш.

Агымдагы елда 5 илкүләм проектны һәм 3 дәүләт программасын гамәлгә ашыру буенча килешүләр төзелгән, аларда 222 төзелеш һәм ремонт объекты бар. «Торак һәм шәһәр мохите» илкүләм проекты кысаларында 43 объектны гамәлгә ашыру планлаштырыла. «Уңайлы шәһәр мохитен формалаштыру» федераль проектының 42 объекты апрель ахырына кадәр сатуга чыгачак. «Экология» илкүләм проектының 3 объектын гамәлгә ашыру дәвам итә. Алар буенча контрактлар төзелгән. Бу - Казанда биологик чистарту корылмаларын рекультивацияләү (эшләр 75,6%ка башкарылган), Казанда ләм кырларын (66%) һәм Саба районының Шәмәрдән авылында нефтьле пычранулар белән бозылган җирләрне рекультивацияләү. Биредә эшләр 65%ка башкарылган.

«Сәламәтлек саклау» илкүләм проектына кергән 128 объект буенча дәүләт контрактлары якынча февраль аенда имзаланачак. Планнарда ике поликлиника, гомуми практика табибы үзәге һәм 20 ФАП төзү. Шулай ук 82 ФАП һәм 23 медицина учреждениесе ремонтланачак.

Шулай ук февраль аена «Мәдәният» илкүләм проектына кергән 4 объектны контрактлаштыру планлаштырыла. Быел 2 авыл мәдәният йорты, балалар сәнгать мәктәбе ремонтланачак һәм Казанда Казан дәүләт яшь тамашачы театрын реконструкцияләү башланачак.

2024 елга «Мәгариф» илкүләм проекты паспорты белән «Хәзерге заман мәктәбе» федераль проекты буенча Казанда һәм Лаеш районында 2 мәктәп төзелеше каралган (алар буенча контрактлар төзелгән). Питрәч районы Көек авылында яңа төзелгән мәктәпкә өстәмә корпус февраль аенда сатуга чыгачак.

«Яшьләргә ярдәм итү системасын үстерү» һәм «Һәр баланың уңышы» федераль проектларына кергән тагын 3 объект февраль ахырына кадәр планлаштырылган.

Быелгы дәүләт программалары турында. "Авыл территорияләрен комплекслы үстерү" программасына 23 объект кергән. Аларның барысы буенча да контрактлар февральдән дә соңга калмыйча төзелергә тиеш. Шулай ук февральдә «Мәгарифне үстерү» дәүләт программасына кертелгән 6 мәгариф оешмасы һәм «Су басулардан һәм башка тискәре йогынтылардан саклау һәм гидротехник корылмаларның иминлеген тәэмин итү» дәүләт программасына кергән 9 объект буенча контрактлар төзү планлаштырыла.

Коммуналь инфраструктураны модернизацияләү федераль программасының 48 объектының 41е программага беренче тапкыр кертелгән. 34 яңа объектка контрактлар төзелгән.

Республика программалары буенча хәл түбәндәгечә. Ике программа буенча дәүләт контрактлары төзелгән. Бу - 4 ябык футбол манежы һәм 15 универсаль спорт мәйданчыгы, шулай ук халыкка комплекслы хезмәт күрсәтү пунктлары төзү. 4 программа буенча объектлар буенча контрактлар төзелгән, калган объектлар буенча февральдә төзелергә тиеш. Бу торак пунктлар, ФАПлар һәм медицина учреждениеләре башкарма комитетлары биналарын, балаларны савыктыру лагерьларын төзү һәм ремонтлау һәм 63 белем бирү учреждениесен ремонтлау. Контрактлы фельдшер-акушерлык пунктлары өлешендә эш башланды. Программаның 12%ы үтәлгән.

6 программа буенча контрактлар февраль ахырына кадәр узачак. Бу - ресурс үзәкләрен, стационар социаль хезмәт күрсәтү оешмаларын, урманчылык һәм урман хуҗалыкларының административ биналарын, муниципаль архивларны, хәрби комиссариатларны капиталь ремонтлау. Алтынчы программа язгы ташулар вакытында суларның тискәре йогынтысын булдырмауга, халыкны һәм объектларны саклаугаюнәлдерелгән.

Тагын 3 программа март аена билгеләнгән. Аларда яшүсмерләр клубларын һәм спорт объектларын ремонтлау, шулай ук стационарларның кабул итү-диагностика бүлекчәләрен ремонтлау һәм төзү керә.

Тугыз программа март-апрель айларында контрактлар төзүне көтә. Бу тулай торакларны, азык-төлек блокларын, Росгвардия һәм җәмәгать судьялары биналарын ремонтлау буенча 4 программа, шулай ук инженерлык челтәрләренең баш идарәсе тарафыннан гамәлгә ашырыла торган коммуналь инфраструктураны модернизацияләү буенча 5 программа.

Марттан майга кадәр ике программа объектларына контрактлар төзү көтелә - яшьләр үзәкләрен ремонтлау һәм психологик-педагогик ярдәм үзәкләре биналарын капиталь ремонтлау.

Җәмәгать киңлекләре буенча республика өлеше апрель-май айларына билгеләнгән.

Күп фатирлы йортларны капиталь ремонтлау программасы кысаларында бүгенге көндә 571 объект буенча подряд оешмалары билгеләнгән.