Рөстәм Миңнеханов ТР Министрлар Кабинетының Юл хәрәкәте куркынычсызлыгы буенча утырышында: Өстенлекле бурыч – мөмкин кадәр күбрәк кешенең гомерен саклап калу

Системалы чараларны гамәлгә ашыру республикада юл-транспорт һәлакәтләрен киметергә мөмкинлек бирде, һәм безнең өстенлекле бурычыбыз – мөмкин кадәр күбрәк кешенең гомерен саклап калу. Бүген бу хакта Татарстан Республикасы Рәисе Рөстәм Миңнеханов Татарстан Республикасында юл хәрәкәте куркынычсызлыгын арттыру чараларына, юл-транспорт һәлакәтләрен киметүгә һәм аларның нәтиҗәләренең авырлыгын киметүгә багышланган Татарстан Республикасы Министрлар Кабинеты утырышында хәбәр итте.

ТР Министрлар Кабинеты утырышын Татарстан Премьер-министры Алексей Песошин үткәрде. Чара барлык муниципаль районнар белән видеоконференцэлемтә режимында узды.

Рөстәм Миңнеханов билгеләп үткәнчә, юл-транспорт һәлакәтләре саны, транспорт чаралары саны артуга карамастан, кими бара. Гомумән алганда, бу - барлык ведомстволар тарафыннан алып барылган зур системалы эш нәтиҗәсе, дип ассызыклады ул һәм Юл хәрәкәте иминлеге буенча комиссия эшен билгеләп үтте.

ТР Рәисе 2013 елдан 2023 елга кадәр юл-транспорт һәлакәтләре динамикасы күрсәтелгән слайдны экраннарга чыгаруны сорады. Мәсәлән, 2013 елда Татарстанда 5410 юл-транспорт һәлакәте теркәлгән булса, аларда 709 кеше һәлак булган, 7032 яраланган, 2017 елда – 4690 юл-транспорт һәлакәте, 379 кеше һәлак булган, 5698 кеше яраланган, 2022 елда - 3353 юл-транспорт һәлакәте, 306 кеше һәлак булган, 4145 кеше яраланган. 2023 елның 11 аенда республикада 3076 юл-транспорт һәлакәте теркәлгән, 250 кеше һәлак булган, 3674 кеше яраланган.

"Системалы чараларны гамәлгә ашыру республикада юл-транспорт һәлакәтләрен киметергә мөмкинлек бирде, - диде Рөстәм Миңнеханов. - Мин ЮХИДИ, районнардагы ЮХИ комиссияләре хезмәткәрләренә рәхмәт белдерәсем килә. Аварияләр арткан районнарда алар үзләренең эшләп җиткермәвен аңларга тиеш.

Рөстәм Миңнеханов юл хәрәкәте куркынычсызлыгы өлкәсендә эш алып барырга кирәк булган ике юнәлешне билгеләп үтте. Бу, аның сүзләренчә, каршы як полосага чыгу һәм җәяүлеләрне бәрдерү.

"Без аергыч полосаны кайда ясый алуыбызны максималь билгеләргә тиеш",  - диде ул. - Моны эшләү мөһим, бигрәк тә куркыныч урыннар булган җирләрдә. Икенчедән, бу торак пунктларда җәяүлеләрне бәрдерү. Күпме җәяүле гомере өзелә! Бу ике мәсьәләгә аерым игътибар бирергә кирәк.

Рөстәм Миңнеханов шулай ук «пилотсыз очкычлар» ярдәмендә юлларда авария булган урыннарны контрольдә тотарга кушты.

Татарстан Рәисе бүгенге нотыкларда юл-транспорт һәлакәтендә балаларның һәлак булуы турындагы саннар аталуын билгеләп үтте. Балаларга куркынычсыз тәртип нигезләрен сеңдерергә, юл хәрәкәтендә катнашканда уңай үрнәк күрсәтергә кирәк. "Машина йөртү культурасы, җәяүлеләр культурасы бездә әлегә җитәрлек түгел",  - диде ул.

Рөстәм Миңнеханов шулай ук самокатларны, шулай ук юлларда мотоциклларны куллануны тәртипкә китерергә кирәк дип саный. "Минем мотоциклларга каршы бер  фикерем дә юк, - диде ул. - Әмма мотоциклчылар еш кына тавыш режимын, башка кагыйдәләрне үтәми. Моңа каршы көрәшергә кирәк".

Нәтиҗә ясап, Рөстәм Миңнеханов белдергәнчә, бүген юл хәрәкәте иминлеген тәэмин итү буенча зур эш алып барыла һәм гомумән хәл яхшыра. "Без көн саен юл-транспорт һәлакәтләре турында сөйләшәбез, - диде ул. - Хәлне контрольдә тотарга кирәк".

ТР Рәисе барлык кызыксынган министрлыклар һәм ведомстволар вәкилләренә, Юл хәрәкәте куркынычсызлыгы буенча Хөкүмәт комиссиясенә, муниципаль берәмлекләргә һәм массакүләм мәгълүмат чараларына башкарылган эшләре өчен рәхмәт белдерде.

Аннары юл хәрәкәте иминлеген тәэмин итү буенча иң яхшы муниципаль комиссияләрне бүләкләү узды. Быелгы эш нәтиҗәләре буенча Татарстан Республикасы Хөкүмәте комиссиясе Чистай һәм Мамадыш районнарын иң яхшылары дип таныды.

Шулай ук «Мин – мәктәп укучысы» сервисында мобиль кушымтаның юл хәрәкәте куркынычсызлыгы буенча республика конкурсында җиңүчеләр бүләкләнде.