Татарстан Рәисе: Аддитив технологияләр илнең технологик суверенитетын тәэмин итүгә зур өлеш кертә ала

Аддитив технологияләр тормышыбызның күп аспектларын яхшырта һәм илнең технологик суверенитетын тәэмин итүгә зур өлеш кертә ала. Бу хакта Татарстан Республикасы Рәисе Рөстәм Миңнеханов «Аддитив технологияләр - яңа чынбарлык» V Лидер - Форумында белдерде. Чара Казан Бәшир Рәмиев исемендәге ИТ-паркта уза. 

V «Аддитив технологияләр - яңа чынбарлык» V Лидер - Форумы - аддитив технологияләр өлкәсендәге соңгы казанышларны, тармакның әйдәп баручы экспертларын һәм инновацион компанияләр вәкилләрен берләштерүче Россиядә төп мәйданчык. Форум 2 көн дәвам итәчәк - 20-21 ноябрь көннәрендә. Аның эшендә 2,5 меңнән артык кеше, РФнең 15 әйдәп баручы югары уку йорты, 120дән артык предприятие катнаша. 

Тематик күргәзмәдә республика Рәисе 3D-басманың илебездәге яңа технологияләре, шулай ук бастырылган эшләнмәләр үрнәкләре белән танышты. Бу өлкәдә казанышларны КНИТУ-КАИ, КНИАТ, ТР Цифрлы трансформация үзәге һәм башка оешмалардан Татарстан эшләнмәләре дә тәкъдим иттеләр.

Рөстәм Миңнеханов билгеләп үткәнчә, республика һәрвакыт яңа технологик көнкүрешкә күчүнең алдынгы рәтендә булды, аның нигезен аддитив производстволар тәшкил итә. Бу көчле сәнәгать базасы һәм фәнни-белем бирү һәм технологик комплексларның уникаль комбинациясе аркасында мөмкин булды. "Сәнәгать һәм авыл хуҗалыгы продукциясен җитештерү күләме буенча Татарстан Идел буе федераль округы субъектлары арасында беренче урында һәм Россиядә бишенче урында тора. Санкцияләр басымына карамастан, 2022 елда төбәк икътисады үсеш күрсәтте", - диде ул.

Республика Рәисе билгеләп үткәнчә, Татарстанда тикшеренүләр һәм эшләнмәләр нәтиҗәләрен коммерцияләштерү инновацияләрне алга этәрүнең үсеш алган региональ системасы тарафыннан башкарыла. "Күптән түгел аның инфраструктурасы тагын бер мөһим элемент белән тулыланды – машина төзелеше өлкәсендә стартап-студия", - диде Рөстәм Миңнеханов, шулай ук республикадан 442 фәнни проектның "Студентлар стартабы" федераль конкурсында җиңүче дип танылуын хәбәр итте. Бу илнең башка субъектларына караганда күбрәк.

Татарстан Рәисе ассызыклавынча, бүген бөтен дөньяда аддитив технологияләр бик тиз үсә. Алар машина төзелешенә, энергетикага, төзелешкә, нефть химиясенә, сәламәтлек саклауга һәм башка күп тармакларга актив үтеп керә.

"Бу технологияләр булган әйберләрнең характеристикаларын яхшыртырга гына түгел, ә башка ысуллар белән дә ясап булмый торган принципиаль яңа конструкцияләр булдырырга мөмкинлек бирә. Экспертлар бәяләвенчә, 2030 елга дөньяда җитештерелгән барлык продукциянең өчтән ике өлеше басылган комплектлаучылардан торачак. Безнең илдә дә аддитив җитештерүнең гаять тиз үсеше билгеләнә. Әйтик, узган елны гына да бу өлкәдә эшләүче компанияләрнең әйләнеше 5 тапкырга арткан", - диде Рөстәм Миңнеханов.

Ул форумны оештыручыларга Казанны шундый мөһим чара уздыру урыны итеп сайлаганнары өчен рәхмәт белдерде. "Татарстан аддитив җитештерү продукциясен актив кулланучы буларак кына түгел, ә төп карарлар генераторы ролен дә уйнарга әзер. Бу эштә без тармак лидеры – "Росатом" дәүләт корпорациясе белән хезмәттәшлекне тирәнтен ныгыту яклы без", - дип өстәде Рөстәм Миңнеханов.