Рөстәм Миңнеханов Петербург халыкара газ форумы күргәзмәсен карады

Татарстан Рәисе Рөстәм Миңнеханов Петербург халыкара газ форумы күргәзмәсе белән танышты.

Форумның күргәзмә программасы «Экспофорум»ның өч павильонында, биналарда да, ачык һавада да җәелдерелгән. 50 мең кв. метрдан артык мәйданда 500дән артык Россия һәм чит ил компанияләре үз продукциясен тәкъдим итә.

Татарстан Республикасы экспонатлар төрлелеге белән  зур стендлар әзерләгән. Рөстәм Миңнехановка хәбәр итүләренчә, күргәзмәдә республикадан 22 компания катнаша. Форум кунаклары «Ак-Барс» холдинг компаниясенең СПГ суднолары макеты, ICL Россия компьютерлары линиясе, «Раритэк Холдинг» АҖнең газ-моторлы авыл хуҗалыгы һәм коммуналь техника яңалыклары һәм башка эшләнмәләр белән таныша ала.

"КАМАЗ" тармак күргәзмәсендә газ-мотор техникасының өч яңалыгын тәкъдим итә. Аерым алганда, компания беренче тапкыр КАМАЗ-6250 вахта газ моторлы автобусы базасында эшләнгән КИПиА 62501 күчмә остаханәсен тәкъдим итә. Машина нефть-газ тармагы өчен махсус эшләнгән. Яңа модельнең төп максаты - стационар ремонт базаларыннан ерак объектларда контроль-үлчәү приборларын һәм аппаратурасын ремонтлау һәм хезмәт күрсәтү. Икенче экспонат 41 урынга исәпләнгән шәһәр яны газ моторлы идәне аста булган  НЕФАЗ-5222 автобусы. Шулай ук «КАМАЗ» ГАҖ стендында табигый газда эшләүче мәҗбүри яндырулы яңа рәттәге алты цилиндрлы двигатель күрсәтелә. 460 ат көчендәге әлеге газ двигательләре К5 буыны КАМАЗ магистраль зур йөк машиналарына урнаштырылачак.