Рөстәм Миңнеханов Казанда Гвардия урамыннан Җиңү проспектына кадәр Вознесение тракты участогын ачуда катнашты

Бүген Казанда Гвардия урамыннан Җиңү проспектына кадәр Вознесение трактының яңа участогын ачу тантанасы булды.

Татарстан Республикасында, Архангельск һәм Свердловск өлкәләрендә автомобиль юллары һәм юл объектлары участокларын ачу «Юл-2023» юллар хуҗалыгы тармагы хезмәткәрләренең бөтенроссия съезды кысаларында видеоконференцэлемтә режимында узды.

Чарада Россия Транспорт һәм юл хуҗалыгы министрлыгы җитәкчелеге, Федераль юл агентлыгы (Росавтодор), федерация субъектлары вәкилләре катнашты.

Татарстан Республикасыннан видеоконференцэлемтә режимында Татарстан Республикасы Рәисе Рөстәм Миңнеханов катнашты.

Видеоконференцэлемтә аша чыгыш ясап, Росавтодор башлыгы Роман Новиков барысын да һөнәри бәйрәм - Юллар хуҗалыгы хезмәткәрләре көне белән котлады, шулай ук Грозныйда уза торган «Юл-2023» съезды кысаларында барлыкка килгән традиция буенча юл тармагы өчен әһәмиятле берничә объект ачыла, дип искәртте.

Мәсәлән, Роман Новиков телекүпер режимында Казанның Совет районында - Гвардия урамыннан Җиңү проспектына кадәр Вознесение тракты төзелеше участогын һәм Архангельск өлкәсендә капиталь ремонт тәмамланганнан соң «Архангельск» халыкара аэропортына керү юлында Төньяк Двина елгасының сул тармагы аша күперне ачу тантанасы узуын хәбәр итте.

"Вознесение тракты - Татарстанда мөһим объект, аның яхшы тарихы бар, - диде Роман Новиков. - Ул Татарстан җитәкчелегенең үҗәтлеге аркасында гына гамәлгә ашырыла алды. Вознесение трактатының бер өлеше - беренче этабы - Гвардия урамыннан Җиңү проспектына кадәр республика башкаласы Казан халкының шәһәрдән чыкканда хәрәкәтен тагын да уңайлырак итә, шулай ук транспортта йөрүне уңайлаштыра".

Рөстәм Миңнеханов үз чиратында Россия Президенты Владимир Путинга, ил Хөкүмәтенә, Россия Транспорт министрлыгына һәм Росавтодорга ярдәмнәре өчен рәхмәт белдерде.

"Юл хезмәткәрлеренең һөнәри бәйрәме алдыннан без бүген Вознесение трактының иң катлаулы участогында хәрәкәтне башлап җибәрәбез, ул безнең юллар салучылар  тарафыннан федераль үзәк ярдәме белән гамәлгә ашырылды, - диде Рөстәм Миңнеханов. - Һәм без Президент Владимир Путинга, Россия Хөкүмәтенә, Транспорт министрлыгына һәм Федераль юл агентлыгына чын күңелдән рәхмәтле. Проект тормышка ашырылды. Бу гаять катлаулы участок 13,4 млрд сум тора. Һәм, әлбәттә, аның дәвамы бар, һәм без алга таба да ярдәм сорап мөрәҗәгать итәчәкбез. Барыгызга да рәхмәт!»

Белешмә өчен:

Бүген Казанда ачылган Вознесение тракты участогы - Татарстан башкаласы өчен мөһим проектның беренче этабы. Участокның озынлыгы Гвардия урамыннан Җиңү проспектына кадәр 4 км тәшкил итә. Участок шәһәрдән өстәмә чыгуны тәэмин итәчәк, транспорт вәзгыятен яхшыртачак, элеккеге сәнәгать территорияләрен үстерүгә этәргеч бирәчәк. Бу Вознесение тракты зонасында төзеләчәк торакның гомуми күләмен арттырачак, дип фаразлана.