Татарстан Рәисе яшьләр сәясәте мәсьәләләре буенча Идел буе федераль округын Советы утырышында катнашты

Татарстан Рәисе Рөстәм Миңнеханов Пермьгә эш сәфәре кысаларында Идел буе федераль округы Советы утырышында катнашты. Яшьләр сәясәте мәсьәләләренә багышланган чара РФ Президентының Идел буе федераль округындагы Тулы вәкаләтле вәкиле Игорь Комаров рәислегендә узды.

Игорь Комаров билгеләп үткәнчә, бүген яшьләр илебезнең стратегик оппонентлары ягыннан төп мәгълүмати һәм идеологик йогынты объекты булып тора. "Бу чакыруга лаеклы каршы тору, Россиянең фундаменталь кыйммәтләрен ныгыту максатларында, дәүләт хакимияте органнарының, мәгариф структураларының һәм гражданлык җәмгыятенең системалы эшен һәм яшьләр яшәргә һәм эшләргә теләгән илнең киләчәге турында мөһим образлар эшләүне күздә тота», - диде РФ Президентының Идел буе федераль округындагы Тулы вәкаләтле вәкиле.

Ул бүген яшьләр сәясәте өлкәсендә гамәлгә ашырыла торган берничә проектны билгеләде. Алар арасында мәгариф министрлыгының «Мөһим нәрсәләр турында сөйләшүләр» проекты һәм мәктәп директорларының тәрбия эше буенча киңәшчеләре вазыйфаларын кертү. Мәгариф һәм фән министрлыгы, яшьләр сәясәте һәм тәрбия эше буенча Бөтенроссия проректорлар советын булдырып, мөһим адым ясады. Яшьләр эшләре буенча федераль агентлык яшьләр белән үзара хезмәттәшлекнең бөтен системасын актуаль темаларга, шул исәптән илебезнең МХОдә җиңү өчен тырышлыкларына ярдәм итүгә бәйле темаларга да, багышлау буенча киң эш алып бара. Шулай ук РФ Президентының Идел буе федераль округындагы Тулы вәкаләтле вәкиле Оборона министрлыгының «Юнармия» хәрәкәтен үстерү һәм Россия ДОСААФының кораллы көчләр өчен белгечләр әзерләү буенча зур тырышлыкларын билгеләп үтте.

Игорь Комаров сүзләренчә, илдә тәрбия процессы өчен җитди нигез булып «Беренчеләр хәрәкәте» оешмасы эшчәнлеге торачак. "Әгәр хәрәкәт тырышлыгы белән барлык уку оешмаларында балалар, яшүсмерләр һәм яшьләрнең үз инициативаларын туплаучы мәйданчыклар булдырылса, аларга үз идеяләрен гамәлгә ашыру мөмкинлеге бирелсә, бу актив һәм реалистик тормыш позициясен булдыруга, мөстәкыйль эшләүнең кирәкле практик күнекмәләрен формалаштыруга зур адым булачак", - дип ассызыклады РФ Президентының Идел буе федераль округындагы Тулы вәкаләтле вәкиле.

Игорь Комаров билгеләп үткәнчә, бүген округ дәрәҗәсендә балалар һәм яшьләрнең төрле категорияләренә юнәлдерелгән иҗтимагый проектларны гамәлгә ашыру буенча актив эшчәнлек алып барыла. Узган ел иҗтимагый проектларда катнашучылар саны 1 миллионнан артып киткән.

"Һәр иҗтимагый проект муниципаль яки хәтта мәктәп дәрәҗәсеннән башланып, төбәк һәм округ этапларын үз эченә алырга тиеш. Һәр баланың һәм яшь кешенең, яшәү урынына карамастан, аларда катнашу мөмкинлеген тәэмин итәргә кирәк. Бу очракта гына без үсеп килүче буын белән эшләүдә системалылыкка ирешәчәкбез», - дип ышаныч белдерде Игорь Комаров.

РФ Президентының Иҗтимагый проектлар идарәсе башлыгы Сергей Новиков хәбәр иткәнчә, бүгенге көндә «Беренчеләр хәрәкәте» Идел буе федераль округының барлык субъектларында үз эшчәнлеген уңышлы җәелдергән. 340 мең кеше теркәлгән инде. Муниципаль берәмлекләрдә җирле бүлекчәләр советлары төзелә. Барлыгы 286 җирле бүлекчә һәм 6 мең 870 башлангыч оешма ачылган.

„Беренчеләр хәрәкәте" төбәк проектларында Идел буе федераль округыннан 90 меңнән артык кеше катнашкан. Җәйге сәламәтләндерү кампаниясе кысаларында һәр субъектта „Беренчеләр хәрәкәте"нең база лагеры билгеләнде", - дип өстәде Сергей Новиков.

Яшьләр эшләре буенча федераль агентлык җитәкчесе урынбасары Дамир Фәттахов билгеләп үткәнчә, Агентлык яшьләрне гражданлык-патриотик тәрбияләүгә юнәлдерелгән комплекслы программаны тормышка ашыра. Идел буе федераль округында гына да 1,8 миллионнан артык яшь кешене колачлаган 27 меңнән артык чара уздырылган.

"Без милләтара һәм конфессияара мөнәсәбәтләрне үстерүгә зур игътибар бирәбез. Күп милләтле Идел буе федераль округында халыклар арасында дуслыкны һәм татулыкны саклау мәсьәләләре аеруча актуаль. Шуңа күрә нәкъ менә округ территориясендә, Татарстанда, күптән түгел ИХО илләренең Глобаль яшьләр форумы узуы очраклы түгел», - дип өстәде Агентлык башлыгы урынбасары.

Утырыш барышында кайбер төбәк башлыклары яшьләр белән тәрбия эшен камилләштерү тәҗрибәләре турында сөйләделәр.