Рөстәм Миңнеханов һәм Максим Решетников «Алабуга» МИЗ һәм «Алабуга Политех» эшчәнлеген бәяләделәр

Бүген Татарстан Республикасы Рәисе Рөстәм Миңнеханов һәм Россия Икътисадый үсеш министры Максим Решетников «Алабуга» МИЗ һәм «Алабуга Политех»та булдылар.

Визит кысаларында кунакларга махсус икътисадый зона буенча күзәтү экскурсиясе үткәрелде. Аерым алганда, делегация AURUS автомобильләр җитештерү заводында булды. Исегезгә төшерәбез, аларның серияле җитештерүе МИЗ территориясендә 2021 елның маенда әзер индустриаль мәйданнарда эшли башлаган иде, аларны  «Алабуга» төзегән һәм инвесторга биргән иде.

Эш киңәшмәсендә МИЗ генераль директоры Тимур Шаһивәлиев кунакларга «Алабуга»ның яңа проектларын тәкъдим итте.

Кунаклар Россиядә иң эре «Алабуга Политех» мәгариф үзәге инфраструктурасы белән таныштылар, аның максатчан куәте елына 10 мең кеше. Биредә дуаль укыту программасы гамәлгә ашырыла, аның кысаларында укучылар көннең беренче яртысында «Алабуга» МИЗ резидент-заводларының иң яхшы инженерлары остазы җитәкчелегендә заманча җайланмаларда белем алалар, ә икенче яртысында урта махсус белем бирү учреждениеләрендә фәннәрне өйрәнәләр. Шул ук вакытта алар компаниянең юнәлеш бүлекчәләрендә стажировка үтәләр. Укуны тәмамлагач, чыгарылыш укучылары югары квалификацияле һәм кирәкле белгечләр булалар.

"Бик дөрес система. Мондый укучыларны шулай гына тәрбияләп була. Монда барлык мөмкинлекләр, шартлар тудырылган һәм эш урыннары булдырылган. Практик белемнәрне теоретик укытучылар түгел, ә заводлардан инженер-практиклар бирә ала, – дип билгеләп үтте Рөстәм Миңнеханов. - Сезнең Business Cats бизнес-симуляторыгызны балалар икътисадны өйрәнсен өчен  безнең барлык мәктәпләргә кертергә кирәк дип саныйм».

"Масштаблар тәэсирле. Күрәсең, монда зур эш башкарылган", - дип өстәде Икътисадый үсеш министрлыгы башлыгы.

Тимур Шаһивәлиев билгеләп үткәнчә, быел мәгариф үзәгенә 1200дән артык беренче курс студенты укырга кергән, алар 17 юнәлеш буенча белем ала.

Белешмә өчен:

"Алабуга" - Россиядә 1 нче махсус икътисадый зона. Бүген ул иң яхшы инженерлык, төзелеш, логистика, кадрлар һәм социаль инфраструктура бирә торган тулы циклның партнеры булып тора. МИЗ территориясендә 30дан артык уникаль импортны алмаштыручы җитештерү урнаштырылган, алар үз тармакларында лидерлар булып тора. Шәхси инвестицияләрнең гомуми күләме 163,9 млрд сум тәшкил итә, 12 меңнән артык эш урыны булдырылган, ә 2022 елда резидентларның кереме 138 млрд сум тәшкил иткән.