Татарстан Рәисе машина төзелеше һәм электрон продукцияне импортлау һәм экспортлау буенча Кытай сәүдә палатасы Рәисе Чжан Юйцзин белән хезмәттәшлек мәсьәләләре буенча фикер алышты

Бүген Татарстан Республикасы Рәисе Рөстәм Миңнеханов Россия-Кытай палатасының Кытай өлеше рәисе, машина төзелеше һәм электрон продукцияне импортлау һәм экспортлау буенча Кытай сәүдә палатасы Рәисе Чжан Юйцзин белән очрашты.

Россия-Кытай палатасы Россия һәм Кытай дәүләтләре башлыклары инициативасы белән 2007 елда төзелгән. Төп максат - чимал булмаган экспорт, технологияләр трансферы һәм инвестиция хезмәттәшлеге өлкәләрендә конкрет проектларны гамәлгә ашыру өчен шартлар тудыру. Россия-Кытай палатасы ике илнең предприятиеләре һәм оешмалары өчен сәүдә-сәнәгать һәм фәнни-техник алмашуны стимуллаштыруга юнәлдерелгән төрле чаралар оештыра.

Кытай машиналар һәм электрон продукцияне импортлау һәм экспортлау буенча сәүдә палатасына 1988 елның июлендә нигез салына. Аның миссиясе - үз әгъзаларына тышкы сәүдәгә бәйле хезмәтләр күрсәтү, җитештерү, маркетинг, мәгълүмат һәм укыту кебек аспектларда. Оешма 15 меңнән артык компанияне берләштерә.

Республика Рәисе кунакка «РОСТКИ: Россия һәм Кытай – үзара файдалы хезмәттәшлек» форумында катнашуы өчен рәхмәт белдерде. "Бу - үзара эш итүнең, очрашулар үткәрүнең һәм конкрет килешүләргә ирешүнең актуаль мәсьәләләре турында фикер алышу өчен искиткеч яңа мәйданчык. Шулай ук форум кысаларында зур күргәзмә оештырылган", - диде Рөстәм Миңнеханов.

Ул Татарстанның Кытай партнерлары белән актив хезмәттәшлек итүенә, узган ел нәтиҗәләре буенча товар әйләнеше 58%ка артуына игътибар итте.

"Сез Россия-Кытай палатасының Кытай өлешен җитәклисез. Ул чимал булмаган экспорт, технологияләр трансферы, инвестицион хезмәттәшлек өлкәләрендә конкрет проектларны тормышка ашыру өчен шартлар тудыра», - дип билгеләп үтте ТР Рәисе һәм эшлекле элемтәләрне ныгыту өчен үзара бизнес-миссияләр оештырырга тәкъдим итте.

Чжан Юйцзин Кытай предприятиеләренең Татарстан белән хезмәттәшлекне үстерү белән кызыксынулары турында хәбәр итте. "Мин ышанам, күргәзмә һәм сессияләр аша Кытай эшкуарлары инвестиция климатын тирәнрәк аңларлар һәм хезмәттәшлек мөмкинлекләре турында күбрәк белерләр», - дип билгеләп үтте ул.

Юйцзин әфәнде палата компанияләрнең якынаюына ярдәм итәргә, шул исәптән Татарстан Республикасының Сәүдә-сәнәгать палатасы белән актив хезмәттәшлек итәргә әзер дип ышандырды.