Рөстәм Миңнеханов Бөтендөнья сәүдә оешмасы каршындагы Россиянең Даими вәкиле Дмитрий Лякишев белән очрашты

Бүген Татарстан Республикасы Рәисе Рөстәм Миңнеханов Бөтендөнья сәүдә оешмасы каршындагы Россия Федерациясенең Даими вәкиле Дмитрий Лякишев белән очрашты. Очрашу ТР Хөкүмәте Йортында узды.

Очрашу барышында яклар чикләү чаралары шартларында тышкы сәүдә эшчәнлеген үстерү, яңа сату базарларын эзләү һәм экспортлаучы предприятиеләргә ярдәм итү мәсьәләләре буенча фикер алыштылар.

Дмитрий Лякишев Татарстан җитәкчелегенең республика икътисадын, аның тышкы сәүдә өлешен дә кертеп, яңа чакыруларга яраклаштыру буенча башкарган гамәлләрен югары бәяләде. Аерым алганда, ул ассызыклаганча, Татарстанда киң халыкара катнашуда зур чаралар уздыру Россиянең дус илләр белән сәүдә элемтәләрен ныгытуга ярдәм итә. Беренчедән, бу «Россия - Ислам дөньясы: KazanForum» халыкара икътисадый форумы мәйданчыгы.

Белешмә өчен:

Бөтендөнья сәүдә оешмасы (БСО) бөтен дөнья товарлары һәм хезмәтләре сәүдәсенең якынча 98%ын көйли һәм күп яклы сәүдә кагыйдәләрен формалаштыручы бердәнбер оешма булып тора.

Бөтендөнья сәүдә оешмасының көн тәртибенә товарлар базарларына керү, таможня, санитар, ветеринария һәм фитосанитар җайга салу, техник җайга салу, сәнәгатькә һәм авыл хуҗалыгына ярдәм итү, импорт лицензияләү, демпингка каршы, компенсация һәм махсус яклау чараларын куллану, электрон сәүдә хезмәтләре базарларына керү, интеллектуаль милекне яклау мәсьәләләре һәм башка бик күп мәсьәләләр керә. Рәсми рәвештә Россия 2012 елның 22 августында Бөтендөнья сәүдә оешмасының тулы хокуклы әгъзасы булды.