Рөстәм Миңнеханов II Казан глобаль яшьләр саммитының пленар сессиясендә: Яшьләр сәясәте - кеше капиталын үстерүдә өстенлекле юнәлеш

Яшьләр сәясәте - республиканың, шулай ук бөтен илнең кеше капиталын үстерүдә өстенлекле юнәлеш. Бу хакта бүген Татарстан Республикасы Рәисе Рөстәм Миңнеханов II Казан глобаль яшьләр саммитының пленар сессиясендә белдерде.

Пленар сессия «Хәзерге дөньяда балалар һәм яшьләрне тәрбияләүдә традицион кыйммәтләрнең роле» темасына багышланды.

Чара Казан Ратушасында уза. Анда РФ Президентының Идел буе федераль округындагы Тулы вәкаләтле вәкиле Игорь Комаров, Россия балалар һәм яшьләр хәрәкәте идарәсе рәисе Григорий Гуров, Яшьләр эшләре буенча федераль агентлык (Росмолодежь) җитәкчесе урынбасары Дамир Фәттахов, «Ислам Хезмәттәшлеге Оешмасы Яшьләр форумы» халыкара оешмасы президенты Таха Айхан, мәгариф, фән һәм мәдәният мәсьәләләре буенча Бөтендөнья ислам оешмасы генераль директоры (ИСЕСКО) Сәлим бән Мөхәммәт Әл Мәлик һәм башкалар катнаша.

Сессиядә катнашучыларга сәламләү сүзе белән РФ Президентының Идел буе федераль округындагы Тулы вәкаләтле вәкиле Игорь Комаров мөрәҗәгать итте. Ул сайланган теманың актуальлеген билгеләп үтте. "Безнең ил традицион кыйммәтләрне Россия җәмгыяте үсешенең нигезе итеп карый, ул суверенитетны ныгытырга, күп милләтле һәм күп конфессияле илебезнең бердәмлеген тәэмин итәргә мөмкинлек бирә. Мәгариф, тәрбия һәм яшьләр белән эшләү өлкәләре Россия Президенты Владимир Владимирович Путин тарафыннан традицион кыйммәтләрне саклау һәм ныгыту буенча дәүләт сәясәтен гамәлгә ашыруның төп юнәлешләренең берсе буларак билгеләнә", - диде Игорь Комаров.

Рөстәм Миңнеханов, үз чиратында, искәрткәнчә: узган ел - Идел буе Болгарында Ислам динен кабул итүгә 1100 ел тулу елында - Казан ИХО яшьләр башкаласы статусын алды. Беренче тапкыр бу статус шәһәргә Ислам хезмәттәшлеге оешмасының күзәтүче иленә бирелде.

Без ИХО белән мөнәсәбәтләрнең югары дәрәҗәсе белән горурланабыз, Ислам хезмәттәшлеген оештыруның махсуслаштырылган институтлары - ИХО яшьләр форумы, фәнни-техник хезмәттәшлек буенча даими комитет, ислам тарихын, мәдәниятен һәм сәнгатен өйрәнү буенча халыкара фәнни-тикшеренү үзәге белән хезмәттәшлекне киңәйтүгә шатбыз, диде Рөстәм Миңнеханов.

"Безнең хезмәттәшлек шулай ук «Россия – Ислам дөньясы» стратегик күзаллау төркеме эшчәнлеге кысаларында формалаша, мин аны ил Президенты Владимир Путин йөкләмәсе буенча җитәклим. Бүгенге пленар утырышның темасы: "Хәзерге дөньяда балалар һәм яшьләрне тәрбияләүдә традицион кыйммәтләрнең роле". Дөнья тотрыксызлык чорына кергәндә, ул аеруча актуаль. Яшьләр сәясәте - республиканың, шулай ук бөтен илнең кеше капиталын үстерүдә өстенлекле юнәлеш. 2020 елда яшьләр турында федераль закон кабул ителде, ә узган ел ил Президенты Владимир Путин Россиянең һәр төбәгендә яшьләр сәясәте буенча тармак ведомстволары булдырырга йөкләмә бирде. Бу эш Федераль яшьләр эшләре агентлыгы җитәкчелегендә башкарыла. Татарстанда яшьләр эшләре буенча министрлык 2018 елда төзелде", - дип искәртте Рөстәм Миңнеханов.

Татарстанда коммерцияле булмаган оешмалар һәм иҗтимагый берләшмәләр аша балалар һәм яшьләр белән эшләү тәҗрибәсе тупланган, диде Рөстәм Миңнеханов. Узган ел Россия балалар һәм яшьләр хәрәкәте - «Беренчеләр хәрәкәте» оештырылды, аның максаты - гамәлдәге балалар һәм яшьләр оешмаларын ныгыту, аларның үзара эш сыйфатын арттыру, төрле ведомстволарның тәҗрибәсен һәм тырышлыкларын үсеп килүче буын тирәсендә туплау.

"Халыкара яшьләр хезмәттәшлеге Россиянең ислам дөньясы белән мөнәсәбәтләрен ныгытуда мөһим роль уйный", - дип белдерде Татарстан Рәисе. Ул ИХО яшьләр форумы һәм «Беренчеләр хәрәкәте» белән алга таба бергә эшләү үзара хөрмәт һәм мәдәни күптөрлелек кыйммәтләренә нигезләнгән күпполяр һәм тотрыклы дөнья төзүгә мөһим гуманитар өлеш кертәчәгенә ышаныч белдерде.