Казанда соңгы биш елда 16 мәктәп һәм өстәмә корпус һәм 32 балалар бакчасы төзелгән

Казанда соңгы биш елда 16 мәктәп һәм өстәмә корпус һәм 32 балалар бакчасы төзелгән. Мондый мәгълүматларны бүген мәгариф һәм фән хезмәткәрләренең республика август киңәшмәсенең пленар утырышында Казан мэры Илсур Метшин китерде.

Киңәшмә Казанда Б.Рәмиев ис. ИТ-парк мәйданчыгында уза.   Быел төп тема - «Татарстан Республикасы мәгарифе: төп бурычлар, әхлакый ориентирлар, сыйфат күрсәткечләре».

Чарада Татарстан Республикасы Дәүләт Киңәшчесе Минтимер Шәймиев, Мәскәү мэрының социаль үсеш мәсьәләләре буенча урынбасары Анастасия Ракова, Россия Дәүләт Думасы һәм ТР Дәүләт Советы депутатлары, югары уку йортлары ректорлары, педагоглар катнаша.

Киңәшмәнең онлайн-трансляциясе оештырылган.

Казан мэры билгеләп үткәнчә, шәһәрдәге мәктәпләрнең 40%ы ике сменада укый. Беренче сыйныфлардан 15е формалашкан мәктәпләр бар.

Быел Казан мәктәпләрендә 174 меңләп укучы парталарга утырачак, диде ул.

30 меңнән артык хезмәткәр, шуларның 17 меңе – педагоглар, Казанның мәгариф учреждениеләрендә эшлиләр.

Соңгы 5 елда Казанда 132 мәктәп ашханәсе ремонтланган, диде Илсур Метшин. Гомумән алганда, бүген шәһәрдә 169 заманча мәктәп ашханәсе эшли, якын арада калган мәктәп ашханәләрен ремонтлау планлаштырыла.

Исегезгә төшерәбез, мәгариф тармагындагы вәзгыять турында төп нотык белән Татарстан мәгариф һәм фән министры Илсур Һадиуллин чыгыш ясады. Алдан алынган мәгълүматларга караганда, Татарстанда БДИның тугыз ике йөз баллының җидесе Мәскәү һәм Санкт-Петербург югары уку йортларында укуны дәвам итәргә планлаштыра, дип белдерде Илсур Һадиуллин педагогика хезмәткәрләренең август киңәшмәсендә.

"Безнең югары уку йортларыбыз һәм предприятиеләр җитәкчеләренә, муниципалитетлар башлыкларына мөрәҗәгать итәсем килә. Узган елның 14 ике йөз балл җыйганнардан республика югары уку йортларында бары тик алты кеше генә белем ала», – диде ТР мәгариф һәм фән министры.

Ул ассызыклаганча, талантлы абитуриентларны үзебездә алып калу, аларга Татарстанда югары белем алу, эшкә урнашу һәм карьера үсеше мөмкинлекләрен тудыру мөһим.

Мисал итеп Илсур Һадиуллин Казан федераль университетының (КФУ) уңай тәҗрибәсен китерде. Югары уку йорты җитәкчелеге беренче курс студентларына – халыкара һәм бөтенроссия укучылар олимпиадаларында җиңүчеләргә һәм призерларга, БДИда йөз балл җыйганнарга бер тапкыр 300 мең сумга кадәр стипендия түләү турында карар кабул иткән.

Быел Татарстан мәктәпләрен тәмамлаучылар 199 йөз баллы нәтиҗә алган. Ике фән буенча ике йөз баллны тугыз унберенче сыйныф укучысы алган.

ТР мәгариф һәм фән министры Илсур Һадиуллин август киңәшмәсендә хәбәр иткәнчә: Лаеш һәм Питрәч районнарында мәктәпкәчә белем бирүнең 100 процентка ирешү мөмкинлеге булмау куркынычы күзәтелә. "Шуңа бәйле рәвештә әлеге, шулай ук Биектау һәм Тукай районнарында торак һәм мәгариф объектларын төзүне планлаштыруда килешмәүчәнлек проблемасын аерым билгеләргә телим", — дип билгеләп үтте министр. Ул Питрәч районының Көек авылындагы хәлне күрсәткеч дип атады - анда мәктәп яшендәге 2,5 мең бала яши, әмма бер генә гомуми белем бирү оешмасы -  "Алгоритм" лицее. Моннан тыш, «Царево усадьбасы» торак комплексында, Олы Кабан, Габишево, Сокурово авыл җирлекләрендә балалар бакчаларында урыннар җитмәү куркынычы бар.

"Без хәлне тиз арада төзәтергә мәҗбүр, гәрчә аны муниципаль дәрәҗәдә төзелеш планнарын формалаштыру этабында ук булдырмаска мөмкин иде", — дип хәбәр итте министр. Ул соңгы елларда 300 гә якын балалар бакчасы ачылуын да әйтте.

Илсур Һадиуллин хәбәр иткәнчә, 2023 елның 1 сентябрендә Зеленодольск суднолар төзү колледжы ачылачак. Ул аңлатканча, колледжны булдыру турында карар «Ак Барс» суднолар төзү корпорациясе тәкъдиме буенча һәм Татарстан Республикасы Рәисе  Рөстәм Миңнеханов карары нигезендә кабул ителгән.

Министр шулай ук «Ана теле» татар телен өйрәнү онлайн-мәктәбе илебез платформасына күчереләчәк дип хәбәр итте. «Яңа платформага "Ана теле» контентын урнаштыру эше башланды", - диде Илсур Һадиуллин.

ТР мәгариф һәм фән министры август киңәшмәсендә Казанда яңа сквер төзү һәм Казансу яр буенда укытучыга һәйкәл кую планнары турында хәбәр итте. Ул билгеләп үткәнчә, бу эшләр Россия Президенты Владимир Путин тарафыннан Педагог һәм остаз елы дип игълан ителгән агымдагы 2023 елга планлаштырылган.

Киңәшмә башында Россия Мәгариф министры Сергей Кравцов катнашучыларга видео сәламләү сүзе белән мөрәҗәгать итте. Ул, аерым алганда, хәбәр иткәнчә, 2025 ел ахырына кадәр барлык мәктәп фәннәре буенча бердәм дәреслекләр эшләнәчәк. Бу белем бирү киңлегенең сыйфатын һәм бердәмлеген тәэмин итәргә мөмкинлек бирәчәк. Яңа дәреслекләргә тулысынча күчүне алдагы биш елда гамәлгә ашыру планлаштырыла, дип төгәлләде федераль мәгариф министры.

Ул искәрткәнчә, 10-11 сыйныфлар өчен яңа тарих дәреслекләре инде эшләнгән, ә чыгарылыш сыйныф укучылары өчен дәреслек быелның 1 сентябренә кадәр мәктәпләргә китереләчәк.

Бүген, мәгълүмат сугышы дәвам иткәндә, Көнбатыш хакыйкатьне бозып, тарихи вакыйгаларны ялган яктылыкта күрсәтергә тырыша. Сыйфатлы педагогик белем бирү безнең таянычыбыз булырга тиеш», - дип мөрәҗәгать итте Сергей Кравцов мәгариф һәм фән хезмәткәрләренең республика август киңәшмәсендә катнашучыларга.