Рөстәм Миңнеханов Президент Академиясенең Җәйге Кампусын ябуда: Яшьләр китмәсен өчен, шартлар тудырырга кирәк - нормаль эш, алга таба үсү мөмкинлеге

Бүген Татарстан Республикасы Рәисе Рөстәм Миңнеханов «Президент Академиясенең Җәйге Кампусы» XI халыкара мәгариф форумын ябу тантанасында катнашты.

Чара А.С. Попов исемендәге административ-эшлекле үзәктә (Иннополис шәһәре) узды. Шулай ук онлайн трансляция оештырылган иде.

Йомгаклау пленар дискуссиясе «Киләчәкнең мәгънәләре һәм компетенцияләре» темасына багышланды (модератор булып телевидение алып баручысы Максим Шәрәфетдинов чыгыш ясады). Модератор кампуста катнашучыларга Россия Президенты ярдәмчесе Андрей Фурсенко исеменнән сәламләү сүзләрен укыды.

Форумда катнашучыларга сәламләү сүзләре белән ТР Рәисе Рөстәм Миңнеханов, РФ Президенты каршындагы Россия халык хуҗалыгы һәм дәүләт хезмәте академиясе ректоры (РАНХиГС), «Россия – мөмкинлекләр иле» коммерциячел булмаган автоном оешмасы генераль директоры Алексей Комиссаров мөрәҗәгать итте.

Аерым алганда, Алексей Комиссаров кампусны оештыруның югары дәрәҗәсен билгеләп үтте. "Барысы да тиешле дәрәҗәдә килеп чыкты", - диде ул һәм оештыручыларның форумны оештыруга һәм программага бөтен күңелләре белән бирелгәннәре өчен рәхмәт белдерде.

Рөстәм Миңнеханов, үз чиратында, Президент Академиясенең Җәйге Кампусын үткәрү инде яхшы традициягә әверелүен искәртте. Унберенче ел кампус үткәрәбез, диде ул, без Президент Академиясе Кампусны уздыру урыны итеп безнең республиканы сайлаганы өчен рәхмәтле, һәм традицияләр дә саклана.

Рөстәм Миңнеханов хәбәр иткәнчә, Татарстаннан килгән егетләр (якынча 80 кеше) кампусларда актив катнаша. "Бу бик матур мәйданчык, һәм катнашучылар да - Россиядән генә түгел. Без бер-беребездән өйрәнәбез. Монда барысы да актив, алга омытлучылар.

Татарстан Рәисе әйтүенчә, бүген республика Иннополисны алга этәрергә тели. "Безгә Иннополисны алга этәрергә, Татарстанны алга этәрергә кирәк, - диде ул. - Без сезне сәламләргә бик шат. Сезгә монда бар да рәхәт булсын. Боларның барысы да сезгә файдалы булыр, дип ышанам. Татарстан сезне һәрвакыт көтә. Хуш килдегез!»

Рөстәм Миңнеханов фикер алышу барышында тырышлык һәм хезмәт сөючәнлек – ул гомер буе сакланырга тиешле сыйфатлар, дип билгеләп үтте. Аның сүзләренчә, син инде ирешкән нәрсәләрдән канәгать булып кала алмыйсың, һәрвакыт яңа нәрсәгә ирешергә тырышырга кирәк.

Моннан тыш, диде Рөстәм Миңнеханов, һәркемгә эштә иң мөһиме – акча кебек тоела, әмма акча – иң мөһиме түгел. "Иң мөһиме - үсешкә һәм яңа бурычларны хәл итүгә, яңа максатларга ирешүгә сәләтле кешеләр. Теге яки бу бурычларны үзләштерә алган яшьләр кирәк. Мисал итеп ул кичәге сәфәрен «Алабуга» МИЗ һәм «Алабуга» МИЗ генераль директоры Тимур Шаһивәлиевка китерде. "Алабуга" - илнең иң көчле икътисадый зоналарының берсе, һәм анда бик инициативалы җитәкче. Мин карыйм - ул никадәр максатчан! Аның башында бик күп идеяләр бар. Мондый кешеләр булганда зур һәм җитди проектлар ясарга мөмкин". 

Рөстәм Миңнеханов: "Безнең алда нинди бурычлар тора? Бездә зур республика, якынча 4 млн. кеше яши. Шуңа күрә яшьләр китмәсен өчен генә түгел, киресенчә, аларны монда җәлеп итәргә кирәк. Бездә югары уку йортлары күп, аларны безнең сәнәгать предприятиеләре белән актив берләштерәбезз. Әйтик, Түбән Кама - илнең иң эре нефть химиясе үзәге. Чаллы - "КАМАЗ" ГАҖ. Әлмәт - нефть үзәге. Һәм безнең бурыч - анда югары халыкара дәрәҗәдәге белем бирү үзәкләре булдыру. Башта яшьләр республикадан азрак китсен өчен аларга шартлар тудырырга кирәк. Әлбәттә, китәрләр, һәм бу нормаль. Ләкин иң мөһиме - соңыннан кире кайтулары. Ә менә кире кайту өчен аларга шартлар тудырырга кирәк. Нормаль эш бирегез, үсәргә мөмкинлек бирегез. Иң мөһиме - яшьләргә яшәү шартлары тудырырга, әйбәт яшәү тирәлеге булдырырга һәм алар иң заманча таләпләргә туры килергә тиеш. Мондый бурычларны без үз алдыбызга куябыз. Бу юнәлештә бару мөһим. Бүген кадрлар - иң мөһиме".

Алексей Комиссаров «Россия – мөмкинлекләр иле» платформасында эш, карьера перспективалары һәм потенциаль хезмәткәрләрнең өметләре буенча тикшеренүләр үткәрелүен сөйләде. Ачыкланганча, өлкәнрәк хезмәткәрләр беренче урынга тотрыклылык куйган, ә яшьрәкләр өчен карьера перспективалары, алга таба уку мөмкинлеге, шулай ук кызыклы бурычлар күпкә мөһимрәк булып чыккан. "Иң мөһиме - яшьләргә кызыклы бурычлар кую һәм алар булдыра алмаячак дип курыкмау. Әгәр кызыклы мәсьәләләрне хәл итү мөмкинлеге бар икән, ул чакта эшләү дә кызыклы», - диде Алексей Комиссаров. Ул шулай ук билгеләп үткәнчә, күп кенә яшьләр мөһим моментлар арасында эш урынында булу кызыклы булсын өчен яхшы коллектив һәм җылы атмосфераны атаганнар.

Алексей Комиссаров, 20 яшьлек балага нинди киңәш бирер идегез, дигән сорауга җавап биреп: «Үз хыялларыңнан курыкма. Хыяллану һәм аларны тормышка ашыру. Мин моны соңрак эшли башладым һәм моны иртәрәк эшләргә кирәклеген аңлыйм хәзер".

Рөстәм Миңнеханов Татарстанның инвестицион җәлеп итүчәнлеккә ничек ирешергә омтылуы турындагы сорауга җавап бирде. "Инвестиция җәлеп итүчәнлек - ул бер көн эчендә булмый. Бу реклама гына түгел. Бу барлык хакимият органнарының җентекле эше, - диде ул. - Беренчедән, инвесторның, чит илнекеме ул, илебзнекеме, хакимияткә ышанычы булырга тиеш. Әгәр дә аның хакимияткә ышанычы бар икән һәм хакимият үзе инвестицияләр кертү белән кызыксына икән, бу иң мөһиме. Менә ни өчен Татарстанның төп капиталга инде берничә ел, биш ел, якынча 800 млрд. сум инвестицияләре бар. Безгә инвестицияләр килсен өчен актив эш алып барабыз. Бу елларда иң куәтле инфраструктура булдырылган: бу махсус икътисадый зоналар да, сәнәгать парклары да, ИТ-үзәкләр дә, һәм менә бу шәһәр – Иннополис та. Болар барысы да 15-17 ел элек барлыкка килгән. Икенчедән, без кадрлар әзерләү буенча бик актив эшләдек. Сингапурга укырга җибәрдек. Безнең җитәкчеләрнең барысы да Сингапурда укыды диярлек. Күпләр Стэнфордта укыган. Без Кытай тәҗрибәсен өйрәндек. Без бөтен җирдә – Америкада, Кытайда, Сингапурда укыдык. Минемчә, мондый эш бүген үз нәтиҗәләрен бирә. Бу алга бару өчен яхшы әйбер. Бүген үк бу яңа мәйданчыклар - махсус зоналар, сәнәгать парклары - 500-500 млрд. сумлык продукция бирә, ә элек алар булмаган. Һәм яңа җитештерүләр бу нигездә импортны алмаштыру, җитди сәнәгать предприятиеләре. Мисал китерәм: "Мастер" Кама индустриаль паркы, ул - 1,5 млн. кв. м ябык мәйдан, анда 13 меңгә якын кеше эшли».

Татарстан Рәисе шулай ук Кампуста катнашучыларга – алар яшь һәм актив булганда – төрле юнәлешләрдә эшләргә киңәш итте.

Татарстанның җаны нәрсәдән гыйбарәт, дигән сорауга җавап биреп, Рөстәм Миңнеханов: "Татарстан җаны – ул аның халкы, мәдәнияте һәм тарихы. Без барыбыз да төрле, мөселманнар да, православие динендәгеләр дә. Иң мөһиме - безнең тату, тыныч яшәвебез, килешү һәм тотрыклылык".

Чара ахырында «Кампусның җанлы көндәлеге-2023» видеоролигы күрсәтелде.

Алексей Комиссаров һәм Рөстәм Миңнеханов проектларны яклау нәтиҗәләре буенча иң яхшы команданы бүләкләү тантанасында катнаштылар.

Белешмә өчен:

Президент Академиясенең XI Җәйге Кампусы 2023 елның 14-23 июлендә Татарстан Республикасының «Свияжские холмы» курорт комплексы территориясендә уза. Быелгы фестивальнең темасы - "Киләчәкнең мәгънәләре һәм компетенцияләре".

Президент Академиясенең Җәйге Кампусы - яшьләр өчен еллык белем бирү проекты. Ул талантлы яшьләр арасында аралашу өчен шартлар тудыруга һәм илнең интеллектуаль элитасының яңа буынын формалаштыруга юнәлдерелгән.

Кампуста 220 студент 2-3 бакалавриат курсы һәм 2-4 белгечлек курсы катнаша. Быел командалар составына Президент Академиясенең 80 студенты, шулай ук Татарстаннан 80 укучы керәчәк. Партнер илләрдән 40 чит ил студенты, шул исәптән Кыргызстан, Белоруссия, Таҗикстан, Казахстан, Кытай, Үзбәкстан, Нигерия һ.б. вәкилләре киләчәк. Тагын 20 бала Россия Федерациясенең яңа субъектларыннан.

Программа үз эченә белем бирү өлешен (лекцияләр, семинарлар, вебинарлар, мастер-класслар) һәм команда проект эшен, шулай ук мәдәни-танышу һәм экскурсия чараларын ала.