Алексей Песошин Казан Кремлендә Россия һәм Татарстан дәүләт бүләкләрен тапшырды

Казан Кремлендә сәнәгать, төзелеш һәм транспорт хезмәткәрләренә, медицина даирәләре, мәдәният, массакүләм мәгълүмат чаралары һәм башка өлкәләр вәкилләренә Россия һәм Татарстан дәүләт бүләкләрен тапшыру тантанасы узды. Бүләкләрне республика Премьер-министры Алексей Песошин тапшырды.

"Намуслы эшегез өчен рәхмәт. Һәркемнең үз эшчәнлеге өлкәсе, үз юлы бар, әмма барыгызны да үз эшенә тугрылык берләштерә", – дип мөрәҗәгать итте дәүләт бүләкләре лауреатларына ТР Хөкүмәте башлыгы.

Ул билгеләп үткәнчә, берләшү һәм уртак көчләрне барлыкка килгән бурычларны хәл итүгә юнәлтү – илнең иминлеге һәм социаль-икътисадый үсешенең нигезе. Алексей Песошин ассызыклаганча, Татарстанның социаль-икътисадый үсеше халыкның тормыш сыйфатын яхшыртуга һәм тотрыклы һәм инновацион үсешне тәэмин итүгә юнәлдерелгән. "Бу безнең республикага зур икътисадый потенциалы һәм үсеш алган кеше капиталы булган илнең әйдәп баручы төбәкләренең берсе булырга мөмкинлек бирә", – дип белдерде Татарстан Республикасы Премьер-министры.

Үз сүзләрен раслап, Алексей Песошин билгеләп үткәнчә, быелның биш аенда республиканың тулаем эчке продукт күләме якынча 1,5 трлн сум тәшкил иткән, бу узган ел белән чагыштырганда 3,9%ка күбрәк. Ә сәнәгать җитештерүе бу вакыт эчендә 2022 ел белән чагыштырганда 2,5%ка арткан. "Компьютерлар, электрон һәм оптик әйберләр, электр җайланмалары, җиһазлар, кием-салым, транспорт чаралары, шулай ук прицеплар һәм ярымприцеплар җитештерүнең шактый үсеше күзәтелә", – диде ул.

Сәнәгать җитештерүе күләме буенча Татарстан Россия төбәкләре арасында алтынчы урында һәм Идел буе федераль округында беренче урында тора. Төп капиталга инвестицияләр быелның беренче кварталы нәтиҗәләре буенча 2022 ел белән чагыштырганда 10%ка – 156 млрд сумга кадәр арткан.

"Татарстан - традицияләрнең күп кырлылыгының, кунакчыллыкның, халыкларның бердәмлегенең уникаль мисалы. Проектларны уңышлы тормышка ашыру һәм социаль-икътисадый үсеш республика халкының көндәлек хезмәте нәтиҗәсе булып тора. Нәкъ менә сезнең талант, тырышлык һәм ныклык республикабызны көчле һәм алда баручы итә", – дип нәтиҗә ясады Алексей Песошин.