РФ Премьер-министры һәм Татарстан Рәисе Казан авиация заводында булды

Бүген Казанга эш сәфәре кысаларында Россия Хөкүмәте Рәисе Михаил Мишустин С.П. Горбунов исемендәге Казан авиация заводы - "Туполев" ГАҖ филиалы нда булды.  Аны Татарстан Республикасы Рәисе Рөстәм Миңнеханов озата йөрде.

РФ Премьер-министры җитештерүне модернизацияләү һәм техник яктан яңадан коралландыруның колачлы программасын гамәлгә ашыру барышы белән танышты, Казан авиазаводының җитештерү цехларында булды. Хәзерге вакытта предприятиедә Ту-160 стратегик ракета йөртүчеләре һәм Ту-214 пассажир самолетлары җитештерү, Ту-160, Ту-22М3 ремонтлау һәм алга таба камилләштерү гамәлгә ашырыла.

Михаил Мишустинны титан эретмәләреннән катлаулы геометриянең эре габаритлы детальләрен электрон-нурлы эретеп ябыштыру һәм вакуумда яндыруның уникаль технологиясе белән таныштырдылар. Җайланмалар 80 нче елларда монтажлана, аларны булдыру буенча СССРның дистәдән артык фәнни институты эшли. 2016-2017 елларда корылмалар 80% комплектлаучыларны алыштырып модернизацияләнгән. Яңартулар энергия куллануны 3 тапкыр киметергә, режимга чыгу вакытын кыскартырга (8-10 сәгатьтән 2,5 сәгатькә кадәр), шулай ук эретеп ябыштырылган җөйләрнең югары сыйфатына ирешергә мөмкинлек бирә.

Шулай ук Михаил Мишустин төзелә торган Ту - 214 агрегат-җыю җитештерү цехында булды. Яңа комплекс елына 20 самолет җитештерү буенча бурычларны үтәячәк. Рөстәм Миңнеханов төзелеш аның шәхси контролендә булуын хәбәр итте. Бу - илнең авиатөзелешләрендә иң колачлы төзелеш. Ангарның мәйданы 30,7 мең квадрат метр тәшкил итә.

Предприятие хезмәткәрләре белән аралашу вакытында РФ Хөкүмәте башлыгы Казан авиазаводының җитештерү потенциалын югары бәяләде. "Туполев"ны берләштерү традицияләрен саклап калу, шулай ук яңа идеяләрне һәм эшләнмәләрне тормышка ашыру бик мөһим", - диде ул.

Михаил Мишустин предприятиенең киләчәге илнең авиа тармагы үсешенә турыдан-туры бәйле булуын ассызыклады. Ә Казан авиация заводында Ту-214 җитештерү күләме арту сәбәпле барлыкка килгән гарантияле заказлар предприятиенең киң перспективалары турында сөйли.

Әңгәмә барышында завод хезмәткәрләре ОСК хезмәткәрләренә ярдәм программалары, кадрлар әзерләү һәм яшьләрне һөнәрләренә җәлеп итү перспективалары белән кызыксындылар. Аерым алганда, Хөкүмәт Рәисе инженерлар һөнәрен бүген илдә иң мөһим һөнәрләрнең берсе дип санавын билгеләп үтте. "Әлбәттә, барлык һөнәрләр дә мөһим. Әмма кайчагында нәрсәдер бик мөһим була, һәм бүген бу - инженерлар һәм технологлар", - дип ассызыклады Михаил Мишустин.