Рөстәм Миңнеханов Казанның урам-юл челтәре объектларын карап чыкты

Татарстан Республикасы Рәисе Рөстәм Миңнеханов Казанның урам-юл челтәре объектларын карап чыкты. Аны ТР Премьер-министры Алексей Песошин, ТР транспорт һәм юл хуҗалыгы министры Фәрит Хәнифов, Казан мэры Илсур Метшин озата йөрде.

«Миллениум» күпере янында Рөстәм Миңнехановка күпер аша чыгу һәм керү юлларын ремонтлау турында хәбәр иттеләр. Эшләрне быел башлау планлаштырыла. Хәзерге вакытта ремонт чорына юл хәрәкәтен оештыру схемасы һәм төзелеш-монтаж эшләрен башкаруның календарь графигы эшләнә.

Аннары Татарстан Рәисе Гвардия урамыннан Җиңү проспектына кадәр Вознесение трактының беренче этабы төзелеше барышы белән танышты. Участокның озынлыгы 4 км тәшкил итә. Бүген монда аерым эш төрләре дәвам итә. Беренче участокны быел октябрь аенда тапшыру планлаштырыла.

ТР Транспорт министрлыгы башлыгы Фәрит Хәнифов хәбәр иткәнчә, Вознесение трактатының Җиңү проспектыннан М-7 (8 км) автоюлына кадәрге чираттагы участогында быел иң күп вакыт таләп итүче процесслар, шул исәптән җир асты җәяүлеләр үтү юллары һәм М-7 трассасы белән юл киселеше төзү башкарылачак.

Рөстәм Миңнеханов ассызыклаганча, барлык планлаштырылган эшләрне вакытында башкарырга һәм сыйфатны катгый күзәтергә кирәк.