Рөстәм Миңнеханов һәм Виктор Золотов Татарстан буенча Росгвардия идарәсе өчен яңа бина ачуда катнаштылар

Бүген Татарстан Республикасы Рәисе Рөстәм Миңнеханов Казанда Россия Федерациясе Милли гвардиясе гаскәрләренең федераль хезмәте бүлекчәләрен урнаштыру өчен яңа бина ачуда катнашты.

Чарада катнашу өчен Казанга Россия Федерациясе Милли гвардиясе гаскәрләренең федераль хезмәте директоры – Россия Федерациясе Милли гвардиясе гаскәрләре баш командующие армия генералы Виктор Золотов килде.

"Илебезнең тотрыклы үсеше нигезендә аның социаль-икътисадый потенциалын һәм милли иминлеген ныгыту ята. Моңа күп яктан федераль һәм региональ хакимият органнарының җайга салынган эше ярдәм итә, - диде Виктор Золотов объектны ачуда. - Әлбәттә, Татарстан Россия икътисадының флагманнарының берсе һәм иҗтимагый-сәяси тормыш үзәге буларак дәүләт сәясәтенең бу төп юнәлешләрен уңышлы тормышка ашыруның ачык мисалы булып тора. Бүген Татарстан - куәтле сәнәгать, заманча фәнни-технологик үзәк һәм яңа инфраструктура проектларын гамәлгә ашыру үрнәге булып тора. Дин, мәдәният һәм спорт өлкәсендә федераль һәм халыкара дәрәҗәдәге эре чараларның туплану урыны».

Виктор Золотов ассызыклаганча, төбәкнең тулы үсешенең мөһим факторы булып республика җитәкчелегенең иминлекне һәм хокук тәртибен ныгыту мәсьәләләренә зур игътибар бирүе тора, анда Росгвардиягә аерым урын бирелә.

"Без республика хакимиятләренең гаскәрләр эшчәнлеген ресурслар белән тәэмин итү мәсьәләләрен хәл итүдә ярдәм итүен югары бәялибез, алар ярдәмендә соңгы 5 елда гына да безнең бүлекчәләр балансына 100 берәмлек хезмәт автотранспорты тапшырылган, 40ка якын бина ремонтланган һәм сафка кертелгән, - диде ул. - Бүген, Росгвардия идарәсенең яңа административ бинасын ачып, без тагын бер зур проектны тормышка ашыруга нокта куябыз, болар барысы да ТР Рәисе ярдәме белән чынбарлыкка әверелде. Ассызыклыйм: лицензия-рөхсәт бирү эше үзәге һәм ведомстводан тыш сак бүлекчәләре урнашкан объект халыкка дәүләт хезмәтләре күрсәтүне сыйфатлы арттырырга мөмкинлек бирәчәк».

РФ Милли гвардиясе гаскәрләренең федераль хезмәте директоры сүзләренчә, яңа объект ягулык-энергетика комплексы объектларының иминлеген тәэмин итүне дәүләт контролен гамәлгә ашыру буенча бүлекчәләр эшендә нәтиҗәлелекне арттырырга мөмкинлек бирәчәк, бу хәзерге шартларда бик актуаль. Ведомстводан тыш сак бүлекчәләре дә үсешнең өстәмә импульсын алачак, алар халык һәм оешмаларның мөлкәтен ышанычлы яклауны тәэмин итүгә өлеш кертәчәк.

"Бүген безнең бөтен эшчәнлегебез, хезмәт итү урыны һәм шөгыльләнү төренә карамастан, бердәм максатка буйсына – махсус хәрби операция бурычларына ирешү һәм Россия өчен хәрби куркынычларны бетерү. Башка төбәкләрдәге кебек үк, Татарстан халкы Ватанны саклау эшендә бердәмлек һәм оешканлык күрсәтте. Нәкъ менә Татарстанда беренче ирекле батальоннар оештырылды. Монда республика хакимияте беренчеләрдән булып азат ителгән территорияләрдә тыныч тормышны торгызуга юнәлдерелгән гуманитар проектларга һәм инициативаларга үзәкләштерелгән ярдәм оештырды», - дип белдерде Золотов.

Гомуми җиңүгә Росгвардиянең республика гарнизоны подразделениеләре лаеклы өлеш кертүен дәвам итә, аларның сугышчылары һәм командирлары хәрби элемтә сызыгында да, көндәлек бурычларны үтәгәндә дә батырлык һәм каһарманлык үрнәкләре күрсәтәләр, диде Виктор Золотов һәм бөтен шәхси составка кимчелексез хезмәте өчен рәхмәт белдерде. Ул шулай ук хезмәттәшләренә лаеклы бүләкләр тапшырды.

Рөстәм Миңнеханов, яңа бинаны ачу тантанасында чыгыш ясап, Росгвардия хезмәткәрләренә мөрәҗәгать итеп, болай диде: «Татарстан – Россия Федерациясенең сәнәгать алга киткән төбәкләренең берсе. Һәм бездә булган барлык процесслар Росгвардия тарафыннан хокук тәртибен тәэмин итү, безнең территориядә тотрыклылыкны саклау өчен алып барылган эшкә тыгыз бәйләнгән. Республикада милли гвардия бүлекчәләренең эшенә шартлар тудыруга зур игътибар бирелә. Бу турыдан-туры оператив-хезмәт итү эшчәнлегенең нәтиҗәлелеген арттыруга тәэсир итә һәм безнең гражданнарның тормыш сыйфатына тәэсир итә. Хокук саклау структуралары хезмәткәрләрен яхшы хезмәт шартлары белән тәэмин итү – хакимият органнары өчен иң мөһим бурычларның берсе. Республика һәрвакыт Росгвардиянең тотрыклы һәм нәтиҗәле эшен тәэмин итү өчен кирәкле ярдәм күрсәтә һәм күрсәтәчәк. Хезмәтегез өчен рәхмәт, без моны бәялибез һәм беләбез!»

Рөстәм Миңнеханов бина төзелешенә өлеш керткән һәркемгә яхшы һәм сыйфатлы эше өчен рәхмәт белдерде, ә хезмәткәрләрне яңа йорт белән котлады.