Рөстәм Миңнеханов "Ак Барс" хоккей клубы уенчыларына: Команданың уңышлы чыгышлары - бөтен коллективның планлы эше

Бүген Татарстан Республикасы Рәисе Рөстәм Миңнеханов «Ак Барс» хоккей клубы уенчылары һәм тренерлары белән очрашты.

Очрашу Казан Кремлендә Континенталь хоккей лигасының 2022/2023 елгы сезонына багышланды.

Рөстәм Миңнеханов командага зур хезмәте, ирешкән уңышлары һәм җиңүгә омтылышы өчен рәхмәт белдерде. Ул барысын да 2022/2023 елгы Континенталь хоккей лигасының һәм хоккей буенча Россия чемпионатының көмеш бүләкләре белән котлады.

"Сез җиңүгә чын ихтыярыгызны һәм характерыгызны күрсәттегез, - диде Рөстәм Миңнеханов, спортчыларга мөрәҗәгать итеп. Сезонның икенче яртысында сезнең  тамашалы, һөҗүм итүчән, мавыктыргыч хоккей уйнавыгыз Көнчыгыш конференциянең беренче урыныннан турнирның хәлиткеч этабына эләгүнең нигезе булды".

Рөстәм Миңнеханов команданың юлы җиңел булмавын искәртте. Алтышар уен «Нефтехимик» һәм «Адмирал» белән уйнарга туры килде. Көнчыгыш конференция финалында «Ак Барс» Омскның «Авангард»ыннан уңышлы реванш алды.

"Без барыбыз да көткән финал килде, көндәш - Мәскәүнең «ЦСКА» командасы. Җиде кызыклы һәм мавыктыргыч матч: җиңгәндә шатлану-сөенү, җиңелгәндә күз яшьләре -  боларның барысын да финалда күрдек. Көмеш медальләр яулау җанатарларыбызның күңелендә өмет уятты», - диде Татарстан Рәисе һәм киләсе Гагарин Кубогы безнеке булачагына өмет белдерде.

Әлбәттә, команданың уңышлы чыгышлары - бу бөтен коллективның: команда җитәкчелегенең, уенчыларның, тренерларның һәм административ составның планлы эше, дип ассызыклады Рөстәм Миңнеханов. "Бүген үк сез, үз алдыгызга югары максатлар куеп, киләчәк спорт сезонын планлаштырасыз. Республика хоккей федерациясе җитәкчелегенә һәм клуб спонсорына хоккей үсешенә зур игътибар һәм һәрьяклап ярдәм иткәне өчен рәхмәт белдерәсем килә. Татарстанда гомуми тырышлык белән күнегүләр һәм уңышлы чыгышлар өчен мөмкин кадәр уңайлы шартлар тудырылган», - дип саный Рөстәм Миңнеханов.

Ул шулай ук җанатарларның, гаиләләрнең, дусларның һәм барлык татарстанлыларның команданың җиңүгә омтылышына бәяләп бетергесез өлеш кертүен һәм ярдәм итүен билгеләп үтте.

"Ышанам, сез киләчәктә дә безне үзегезнең югары спорт казанышларыгыз һәм ышанычлы җиңүләрегез белән сөендерәчәксез. Сезгә яңа сезон алдыннан ял итәргә һәм көч җыярга телим", - диде ул.

«Ак Барс» хоккей клубының баш тренеры Зиннәтулла Билалетдинов Рөстәм Миңнехановка команданың эше лаеклы бәяләнгәне өчен рәхмәт белдерде. "Сез безнең уңышларыбызны игътибар белән күзәтәсез һәм ярдәм итәр өчен кулдан килгәннең барысын да эшлисез. Без моны һәрвакыт исебездә тотабыз һәм сизәбез! Команда чыннан да яхшы эш башкарды. Без лаеклы уйнау өчен барысын да эшләдек», диде ул.

«Ак барс» командасы капитаны Александр Радулов шулай ук республика җитәкчелегенә һәм шәхсән Рөстәм Миңнехановка ярдәмнәре өчен рәхмәт белдерде.

Спортчылар Татарстан Республикасы Рәисенә «Ак Барс» хоккей клубы уенчыларының автографлары белән панно һәм Россия Хоккей Федерациясенең көмеш медален тапшырдылар.

Рөстәм Миңнеханов һәм Татарстан Республикасы Хоккей федерациясе президенты Наил Маһанов уенчыларга Россия Хоккей Федерациясенең көмеш медальләрен тапшырдылар. Чара традицион бергәләп фотога төшерү белән тәмамланды.