Татарстан Рәисе FESCO транспорт төркеме җитәкчелеге белән хезмәттәшлек мәсьәләләре турында фикер алышты

Бүген Татарстан Республикасы Рәисе Рөстәм Миңнеханов FESCO транспорт төркеме җитәкчелеге белән очрашты. Очрашу KazanForum киңлекләрендә узды.

Очрашуда транспорт-логистика тармагында, контейнерлар ташуны үстерү өлкәсендә хезмәттәшлек мәсьәләләре, шулай ук белгечләр әзерләү буенча уртак проектларны гамәлгә ашыру турында фикер алыштылар.

FESCO - Россиянең порт, тимер юл һәм интеграцияләнгән логистик бизнес өлкәсендә активлары булган иң эре шәхси транспорт-логистик компанияләренең берсе. Төркемнең күпчелек операцияләре Ерак Көнчыгышта тупланган, бу Россия һәм Азия илләре арасында сәүдә операцияләренең динамик үсеш күләмендә катнашудан өстәмә өстенлекләр алырга мөмкинлек бирә.