Рөстәм Миңнеханов Россиянең Белоруссиядәге илчесе Борис Грызлов белән очрашты

Татарстан Республикасы Рәисе Рөстәм Миңнеханов Россия Федерациясенең Беларусь Республикасындагы Гадәттән тыш һәм Тулы вәкаләтле Илчесе Борис Грызлов белән очрашты. Рөстәм Миңнеханов Минскта эш сәфәрендә.

Россия һәм Белоруссия хезмәттәшлеге ачыклык, тигезлек һәм үзара хөрмәт принципларында үсеш алуын дәвам итә, ә үзара хезмәттәшлек һәм интеграция процесслары җитдирәк була бара. Минскта Россия илчесе буларак, Сезнең хезмәтегез зур. Татарстан белән Белоруссия арасындагы хезмәттәшлекне үстерү шулай ук Россия-Белоруссия мөнәсәбәтләрен ныгытуга ярдәм итәр дип өметләнәбез», - дип билгеләп үтте Рөстәм Миңнеханов.

Үз чиратында Борис Грызлов Рөстәм Миңнехановка шундый вәкиллекле делегациянең илчелеккә визиты өчен рәхмәт белдерде. "Сезне безнең илчелектә кабул итү бик күңелле. Россия Федерациясе субъектлары Белоруссиягә актив киләләр. Сезнең делегация бик вәкиллекле составта. Мин хезмәттәшләремнең актив эшләргә өлгергәнен ишеттем. Казанга баруларымны җылы хисләр белән искә алам. Минтимер Шәриповичка иң яхшы теләкләремне җиткерүегезне сорыйм", - диде Борис Грызлов.

Рөстәм Миңнеханов искәрткәнчә, Беларусь соңгы елларда Татарстанның тышкы сәүдә партнерлары арасында тотрыклы рәвештә лидерлар рәтенә керә. Шуңа да карамастан, мөмкин булган күләм күпкә югарырак, шуңа күрә Татарстан делегациясенең бу визиты сәүдәне арттыру өчен оештырылган.

Искәртеп узабыз, Россиянең Беларусь Республикасындагы илчелегендә делегацияләрне кабул итү залында Россиянең төп истәлекле урыннары, шул исәптән Кол Шәриф мәчете төшерелгән мозаикалар ясалган.

Очрашу тәмамланганнан соң Рөстәм Миңнеханов Минскта Җиңү монументына венок салды.