ТР Авыл хуҗалыгы һәм азык-төлек министрлыгы: Татарстанда язгы кыр эшләрен башкаруга 37 млрд сум акча юнәлдереләчәк

Татарстанда быел язгы кыр эшләрен башкаруга 37,3 млрд сум тотылачак. Бу хакта Татарстан Республикасы Хөкүмәте Йортында узган брифингта республика вице-премьеры - авыл хуҗалыгы һәм азык-төлек министры Марат Җәббаров хәбәр итте.

"Бу:ашламалар, орлыклар, үсемлекләрне яктылыктан саклау, ягулык, запас частьләр һәм башка чыгымнар — хезмәт хакы, салымнар», — дип сөйләде авыл хуҗалыгы һәм азык-төлек министрлыгы башлыгы. Мәсәлән, ашламаларга - 14,3 млрд сум, орлыкларга - 3,4 млрд сум, үсемлекләрне саклау чараларына - 5,4 млрд сум, ягулык-майлау материалларына һәм запас частьләргә 6,5 млрд сум бүлеп бирү планлаштырыла. Башка чыгымнар 7,7 млрд сум тәшкил итәчәк.

Дәүләт ярдәменең төрле юнәлешләре буенча Министрлык хуҗалыкларга 3,6 млрд сум акча бирде, дип ассызыклады М. Җәббаров. "Бюджет ярдәме күрсәтү буенча сайлап алулар дәвам итә», – дип өстәде ул.

Марат Җәббаров хәбәр иткәнчә, Татарстанда чәчү эшләренә 26 район авыл хуҗалыгы хезмәтчәннәре керешкән. Узган атнада Нурлат, Азнакай, Актаныш, Зәй, Чирмешән районнарында бөртеклеләрне чәчүгә беренче булып чыкканнар.

Бүгенге көндә 24,3 мең гектар язгы бөртекле культуралар чәчелгән. Быел чәчү мәйданы 2,7 млн гектар тәшкил итәчәк, бу узган еллар дәрәҗәсендә. Шул исәптән 1,8 млн гектарда язгы чәчүлекләр башкарылачак. Шикәр чөгендере өчен – 52,1 мең гектар, рапс өчен – 143,8 мең, көнбагыш өчен – 187 мең гектар. Бәрәңге республикада 43 мең гектар мәйдан алачак, яшелчәләр-8,9 мең гектар.

"Көздән 472 мең гектарда көзге культуралар чәчелгән. Көзге культураларның торышы гомумән яхшы дип бәяләнә. Без хәзер күзәтеп торган аерым кырлар бар. Кирәк булганда янәдән чәчеләчәк», – дип билгеләп үтте министр.

Марат Җәббаров кыр эшләре өчен һава торышының уңай булуын ассызыклады. "Синоптиклар көндезге температураның күтәрелүен һәм аяз һава торышын фаразлый. Үз алдыбызга кыска вакыт эчендә тырмалауны башкару бурычын куябыз, чөнки тәүлек эчендә гектардан 40 тоннага кадәр су парга әйләнә, яки көн саен 3-4 мм», – дип нәтиҗә ясады ул.

Министр шулай ук Татарстанда 18 марттан традицион авыл хуҗалыгы ярминкәләре башлануын искәртте. Бары ярминкә узган дүрт көнендә 253,5 млн сумлык фермер продукциясе сатылган. Ярминкәләр Казанның 14 мәйданчыгында, Чаллы һәм Зеленодольск районының ике мәйданчыгында, Түбән Каманың өч мәйданчыгында, төрле вакытларда 26 муниципалитетта уза.

Дүрт ярминкәдә фермерлар 676,6 тонна яшелчә, шул исәптән 407,4 тонна бәрәңге, шулай ук 70,6 тонна сөт, 239,6 тонна ит, шул исәптән 184,8 тонна сыер ите саттылар. "Язгы ярминкәләрдә бәяләр көзге-кышкы ярминкәләргә караганда түбәнрәк", – дип билгеләп үтте министр.

М. Җәббаров сүзләренчә, сәүдә оештыру өчен 32 муниципаль район, 3 мең 382 транспорт берәмлеге җәлеп ителгән. Ярминкәләр 22 апрельгә кадәр планлаштырылган.