Рөстәм Миңнеханов һәм Россия Хөкүмәте вице-премьеры Марат Хөснуллин ТР Транспорт һәм юллар хуҗалыгы министрлыгының йомгаклау коллегиясендә катнашалар

Татарстан Республикасы Транспорт һәм юллар хуҗалыгы министрлыгы коллегиясенең киңәйтелгән утырышында бүген Татарстан Республикасы Президенты Рөстәм Миңнеханов катнаша.

Утырыш «Казан Экспо» ХМҮ территориясендә уза, шулай ук Татарстан Республикасы Хөкүмәте сайтында онлайн трансляция оештырылган. Төп тема - 2022 елда Татарстан Республикасы юл-транспорт комплексы эшчәнлеге нәтиҗәләре һәм 2023 елга бурычлар.

Коллегия башланганчы Татарстан Республикасында юллар эшчәнлегенең бишьеллык планын гамәлгә ашыру буенча Россия Федерациясе Хөкүмәте Рәисе урынбасары Марат Хөснуллин катнашында киңәшмә узды.

ТР Транспорт һәм юллар хуҗалыгы министрлыгы коллегиясенең йомгаклау утырышында Марат Хөснуллин сәламләү сүзе белән чыгыш ясады. Ул, аерым алганда, ассызыклаганча, Татарстанда юллар хуҗалыгы өлкәсендә системалы эш югары дәрәҗәдә оештырылган.

"Илкүләм проект кысаларында  төбәк юлларын һәм агломерацияләрдәге юлларны норматив хәлгә китерү проекты алдынгы темплар белән бара. Россия Федерациясе Президенты Владимир Путин Указы белән билгеләнгән күрсәткеч төбәк юлларының 55%ын норматив хәлгә китерү буенча илдә 49,7%ка җитәчәк. Ә Татарстан Республикасында бу күрсәткечкә узган елда ике елга алдан ирешелгән", - диде Марат Хөснуллин. Ул Татарстан җитәкчелегенә һәм республиканың барлык юлчыларына рәхмәт белдерде.

Россия Хөкүмәте вице-премьеры хәбәр иткәнчә, 2028 елга кадәр Татарстан территориясендә юл чараларына федераль бишьеллык план белән федераль бюджеттан 224 млрд. сум бүлеп бирү каралган.

"Транспорт төзелеше күләме буенча Татарстан Россиядә беренче урында. Мин Мәскәүне алмыйм. Планнар зур. Биш еллык планны гамәлгә ашыру нәтиҗәләре буенча юлларның гомуми озынлыгы 520 км артык булырга тиеш", - диде Марат Хөснуллин, ТР Транспорт министрлыгы коллегиясендә катнашучыларга мөрәҗәгать итеп.