«Татнефтехиминвест-холдинг» ААҖ Директорлар советы утырышында кайбер инновацион проектлар буенча фикер алыштылар

Бүген «Татнефтехиминвест-холдинг» ААҖ Директорлар советы утырышында берничә инновацион проект каралды. Утырышны Татарстан Президенты Рөстәм Миңнеханов ТР Хөкүмәт Йортында үткәрде.

«Татнефтехиминвест-холдинг» АҖ генераль директоры Рафинат Яруллин Татарстанның нефть, газ, химия комплексы предприятиеләренең 2022 елгы эшчәнлегенә йомгак ясады.

«ОКБМ Африкантов» АҖ генераль директорының беренче урынбасары Виталий Петрунин хәбәр иткәнчә, Росатомда атом энерготехнология станцияләрен (АТС) эшләп чыгаралар. Аларда зур масштаблы водород җитештерү булачак. Моның өчен экологик яктан имин метанның парокислород конверсиясе ысулы кулланылачак. Түбән Новгород машина төзелеше предприятиесендә югары температуралы газ суытыла торган реакторлар (ВТГР) һәм химик-технологик өлешләр (ХТХ) төзиләр инде.

«Татарстан предприятиеләрен үзара хезмәттәшлеккә чакырырга телибез, - диде ул. - Мәскәү өлкәсенең «Луч» фәнни-җитештерү берләшмәсендә тәҗрибәле җайланманы эшләтеп җибәрү планлаштырыла. Безгә җитештерү мәйданчыгын сайларга кирәк. Күп төбәкләргә анализ ясалды, Татарстан кызыксыну уятты».

«Ун елдан артык элек без бу теманы күтәргән идек, - диде Рөстәм Миңнеханов. - Безнең зур планнарыбыз бар. Бу юнәлештә дәвам итәргә кирәк».

LNG җитештерүнең инновацион термоакустик технологиясе турында Регионара эксперт-аналитика үзәге (Мәскәү) башкарма директоры Анатолий Замрий сөйләде. Аның сүзләренчә, әлеге карар классик технологияләргә караганда икътисадый яктан отышлырак. Сыекландырылган табигый газ Россиянең ерак төбәкләрен газлаштыру һәм газ-мотор ягулыгы буларак куллану өчен перспективалы.

«Татарстанга СПГ җитештерү өчен җайланмалар җитештерү кызыклы булыр дип саныйбыз, - диде Анатолий Замрий. - Монда машина төзелеше яхшы үсеш алган. Әлегә бездә газны сыекландыруның нәтиҗәле технологиясе юк. Алар барысы да көнбатыш компанияләренә карый. «Татнефтехиминвест-холдинг»ны һәм машина төзелеше предприятиеләрен үзара бәйләнешкә җәлеп итәсе килде».

«Бик кызыктыргыч, СПГ технологияләре - популяр тема, - дип билгеләп үтте Рөстәм Миңнеханов. - Бездә РАРИТЭК һәм КАМАЗ бу тема белән җитди шөгыльләнәләр»

«Асвент Инжиниринг» ҖЧҖ техник директоры Александр Рязановский тузан-газдан чистартуның заманча технологияләре турында доклад ясады. Новосибирск компаниясе ҖЭК предприятиеләрендә һаваны чистарту һәм тау эшләнмәләрен химик катышмалардан, тузаннан, көл һәм корымнан чистарту җайланмалары әзерли.

Энергетика өчен җиһазлар һәм микропроцессор техникасы җитештерүне 2023 ел башында Иннополиста Новосибирск компаниясе эшләтеп җибәрергә планлаштыра. Бу хакта «ТАТ-МТ» компаниясе генераль директоры Антон Руденко хәбәр итте. Компания 2009 елдан бирле эшли. «ТАТ-МТ» рельеф саклавы һәм автоматикасы, энергетика өчен приборлар, көч электроникасы, исәп системасы һәм АСУ җитештерә. Уртак предприятиеләр Үзбәкстанда, Казахстанда һәм Кыргызстанда эшли.

«Татарстанда Иннополиста» ТАТ-МТ» "уртак предприятиесе төзергә, җитештерүне локальләштерергә тәкъдим итәбез, - дип өстәде нотыкчы. - Кайбер элементларны җитештерүдән башларга телибез. Мәсәлән, релейлы саклау системалары, электрон контроль-үлчәү кораллары». 

«Электр челтәрләре булган эре компанияләр һәм мобиль операторлар потенциаль клиентлар була ала»,- диде ТР Премьер-министры урынбасары Роман Шәйхетдинов.

Утырышта шулай ук «Татнефтехиминвест-холдинг» акционерларының чираттан тыш җыелышын уздыру мәсьәләләре каралды (аудитор-компанияне алмаштыру кирәклегенә бәйле рәвештә).

«Татнефтехиминвест-холдинг» АҖ генераль директоры Рафинат Яруллин хәбәр иткәнчә, холдингның чираттагы утырышы 27 февральгә билгеләнгән.